Diyarname

Dewleta Tirkiyeyê careke din komkujî pêk anî: 60 kesên li Cizîrê li jêrzemînê de bûn hatin kuştin. Mebûsê HDP'ê Sariyildiz dibêje ew sivîl bûn.

Li Taxa Cudî ya Cizîrê li jêrzemîna avahiyekê ev nêzî du hefteyan e birîndar hebûn. Mebûsê HDP'ê Faysal Sariyildiz roja 23'yê meha borî ji bo raya giştî rewşa birîndarên li jêrzemîna avahiyê ragihandibû. Ji wê rojê de di serî de mebûsên HDP'ê, komek tenduristvan, dayik dixwestin herin birîndaran bînin lê hêzên ewlehiyê yên dewleta Tirkiyeyê nehiştin. Herî dawî duh heyetek ji Hevserokê DBP'ê Kamuran Yuksek, mebûsên HDP'ê Celal Dogan, Dengîr Mîr Mehmet Firat, Îdrîs Baluken, Dîrayet Dîlan Taşdemir û Mithat Sancar pêk dihat ber bi Cizîrê ve kete rê lê polîs û leşkeran pêşî li heyetê girt û nehiştin herin. Û duh êvarê televîzyona dewletê TRT'ê ragihand ku "Li Cizîrê di jêrzemînê de 60 terorîst hatine kuştin".

Lê Walîtiya Şirnexê bi rêzek daxuyaniyek weşand û got: " "Li navçeya Cizîr a bajarê me, di operasyona li hemberî endamên Rêxistina Terora Cudakar de 10 terorîst hatin bêbandor kirin."

Sariyildiz: Ceset şewitî ne

Mebûsê HDP'ê Faysal Sariyildiz ji bo ANF'ê axivî û got: "Di laşên cenazeyan de cihê guleyan tune ye. Ew hatine şewitandin. Di jêrzemîna avahiya duyemîn de 62 kes hebûn, ev agahî li ber destê me ye. Bi dehan ji wan hatin kuştin. Jixwe 9 kes bi şewitandinê kuştibûn. Zarokek li ber derî qetil kiribûn. Kesên hatibûn kuştin jî cenazeyên wan li vê avahiyê bû. Niha li avahiya pişt Petrolê cenazeyên hatine şewitandin hene û di bedena wan de cihê guleyê tune ye."
SAriyildiz wisa got: "Li gor agahiya ku gihîştiye ber destên me 7 cenaze birine nexweşxaneyê. Jixwe xebatkarên nexweşxaneyê xistine odeyek û derî bi ser wan de girtine. Hêzên dewletê nexweşxane girtine bin kontrola xwe."

Li ser gotina "Walîtî dibêje 10 kes hatine bêbandorkirin" jî Sariyildiz wisa gotiye: "Duh êvarê kanala fermî ya dewltê TRT'ê got 60. Paşê agahiya 30'î derket holê. Niha walîtî dibêje 10, Ji bo bandora li raya giştî kêmtir bibe hejmarê kêm didin. Rastiya li vê derê heyî komkujiyek wehşî çêbûye. Hejmar rastiya vê wehşetê naguherîne."

Ajansa dewletê AA dibêje 18 kes hatine kuştin.

Duh bi şev bi bihîstina buyerê re li gelek bajarên Almanyayê û li bajarên din ên Ewropayê kurd daketin qadan û bûyer şermezar kirin. 

Piştî komkujiyê ambulans birin

Her wiha hêzên dewletê piştî komkujiyê vê sibê 2 ambulansên Şaredariya Cizîrê girtin û ji bo cenazeyan bigirin birin Taxa Cudiyê. Li gor agahiyên xebatkarên Nexweşxaneya Dewletê ya Cizîrê jî duh bi şev kesên mirî, birîndar û ne birîndar anîne nexweşxanê.