Moskow

Rêveberiya Xweseriya Demokratîk buroya nûnertiya xwe li paytexta Rusya Moskovayê vekir. Nûnerên Rojavayê Kurdistanê û rayedarên Rus tevlî vekirinê bûn.

Kordeleya vekirinê Berpirsiyarê Karên Derve yê Rojavayê Kurdistanê Sînem Mihemmed û Parlamentera HDP’ê ya Amedê Feleknas Ûca bi hev re qut kirin. Di vekirinê de Serokê Partiya Lîberal a Rusyayê Vladimir Volfoviç Jirinovski û Serokê Organîzekirina Yekîtiya Ermen û Rus Navoyan Yuri Ludvigoviç jî amade bûn.

Di vekirinê de hate gotin ku ev di têkîliyên rus û kurdan de destpêka pêvajoyek nû ye. Sînem Mihammed têkîldarî vekirina nûneriyê ji bo ANF'ê axivî, bal kişand ku ji bo modela Xweseriya Demokratîk a li Rojava ket meriyetê îro rojek dîrokî ye.

Hevserokê Otomoniya Federala Çandî û Neteweyî ya Kurdên Rusyayê Ferhat Patiyev ji bo ajansa Interfaks (Interfax) axivî û got ku nûnerî dê saziyeke raya giştî be ku girêdayî Wezareta Edaletê ya Rusyayê be, lê di pratîkê de dê wekî balyozgehek kar bike.

Li gor agahiyên ku tên di demên pêş de dê Kantonên Rojava li Fransa û Almanyayê jî nûnerî veke.