DÊRIK

Hevserokê Meclisa Damezrîner a Sîstema Federaliya Demokratîk a Rojava-Bakurê Sûriyeyê got ku ew ê meha bê sîstema federaliya demorkatîk îlan bikin û di mehên pêş de jî Meclisa Federaliya Demokratîk damezirînin.

ANHA'yê bi Hevserokê Meclisa Damezrêner a Sîstema Federaliya Demokratîk a Rojava-Bakurê Sûriyeyê Mensûr El-Selûm re axivî. El-Selûm got ku projeya wan ji gelek aliyan ve rastî êrîşan tê û gelek alî îdîa dikin ku ev projeyeke parçebûnê ye, ji ber vê yekê ew projeyê ligel hemû beşên civakê dinirxînin.

El-Selûm got ku ew bêyî vîna gelê xwe tu caran biryaran nastînin û di hemû biryaran de nêrîn û pêşniyarên gelên herêmê esas digirin. El-Selûm got ku li aliyê din komên wan li gorî bernameyeke li her sê kantonên Rojava xebatan didin meşandin.

Mensûr El-Selûm diyar kir ku ew meha bê ango di meha kewçêrê wê bi Meclisa Rêveber û Meclisa Zagonsaz ên Kantona Cizîrê re rûnin, reşnivîsa Hevpeymana Civakî nîqaş bikin, guhertinên pêwîst jî bikin û projeya Federaliya Demokratîk fermî ragihînin.

Di dema pêş de hilbijartin hene

El-Selûm anî ziman ku amadekariyan dikin da ku di nava mehên pêş de, Meclisa Federaliya Demokratîk hilbijêrin û wiha got: “Hilbijrtin giştî ye. Wê ji jêr ve pêk were, ango ji komînan dest pê bike. Tenê ev gel dikare çarenûsa xwe diyar bike. Meclisa Yekîtiya Demokratîk a Rojava-Bakurê Sûriyeyê wê bibe nûnerê vî gelî.”

Armanc Neteweya Demokratîk e

El-Selûm hikmê navnedî ku bi dehan salan gelan gelek êş û azar jê dîtiye, red kir û wiha axivî: “Em dixwazin ku gelê Rojava xwe bi xwe bi rê ve bibe, armanca me avakirina Neteweya Demokratîk û pêşxistina biratiya rasteqîn e. Em dixwazin ji bo herêmê bibin mînak û hemû rêbendên ku hevpeymana Syks-picot li ser gelê me ferz kiriye, bişkînin. Em dixwazin ku tevgera me bibe tevgereke civakî û civakeke durist ku tê de aştî, hezkirin û biratî hebe, ava bikin."