Enqere
Deklerasyona Meclisa Aştiyê ya Enqereyê bi slogana, "Êdî bes e! Bila zarokên me nemirin! Em di pirsirêka kurd de çareseriyek demokratîk û aştiyane dixwazin" amadekirî, ji hêla 225 saziyan ve hate îmzekirin.

Meclisa Aştiyê ya Enqereyê deklerasyona bi slogana, "Êdî bes e! Bila zarokên me nemirin! Em di pirsirêka kurd de çareseriyek demokratîk û aştiyane dixwazin" li Yekîtiya Mulkiyeyan eşkere kir. Federasyona Elewî Bektaşiyan û 172 saziyên girêdayî, KESK, DÎSK, partiyên wekî EMEP, SDP, ODP, DTP, Halkevlerî, Komeleya Dêrsimiyan, Hewildana Azadiya Ramanê û bi tevahî nûnerên 225 saziyên îmze avêtine binê deklerasyonê beşdarî daxuyaniyê bûn. Serokê Federasyona Şoreşker a 78'yan Ruşen Sumbuloglu diyar kir ku ew nîqaşên di demên dawî de li ser pirsgirêka kurd tên meşandin girîng dibînin.

'Kar dikeve ser milê her kesî'

Sumbuloglu der barê mijarê de axivî û wiha got: "Hemû nîqaşên ku tên kirin ji bo ku hawireke bê pevçûn û pêkhatina demokrasiyê ye. Ev yek gelek girîng e. Ji bo çareseriya pirsgirêka kurd peywira girîng dikeve ser milê Saziyên Sivîl, rewşenbîr, komên baweriyê û bi taybetî jî çapemeniyê. Divê her kes bi baldarî tevbigere û zimanê aştiyê bikar bîne. Di vê pêvajoyê de û bedelên ku hatin dayîn, pirsgirêka kurd bi operasyonan çareser nake. Polîtîkayên şîdetê pirsgirêkê kur dike."
Sumbuloglu gotina xwe wiha domand: "Li ser vê axê bi salan e kurd, tirk û hemû gelên din dijîn. Em dixwazin ku ev gel li cem hev û bi hezar salan bijîn. Dayik li ser tabûtên zarokên xwe rondik barandin. Em êdî naxwazin ku em cenazayên keç û xortên xwe bibînin. Em naxwazin çavkaniyên aboriya me ji bo şer bêne bikaranîn. Em êdî naxwazin bi trîlyonan deynê me hebe. Bila êdî ev bê karî û neçarî ji holê rabe."

'Lazim e hikûmet gav bavê'

Sumbuoglu daxwaz kir ku di vê atmosfera erênî de hikûmet jî gavekî biavêje û ev yek lê zêde kir: "Em hêza demokrasiyê xwedî li daxwazên xwe derdikevin. Ji bo ku em zêdetir xwe bidin têkoşîda azadiyê, em bang li rayedarên dewletê dikin ku bila pêngavekî biavêjin."
Ruşen Sumbologlu di dawiya axaftina xwe de destnîşan kir ku saziyên ku îmze avêtin deklerasyonê aştiyê ji bo xwe peywireke girîng dibînin. Sombuloglu ji bo çawereseriya pirsgirêka kurd ev daxwaz anîn ziman:

* Bila Operasyon û çek rawestin

* Li Tirkiyeyê ji bo her kesî de demokrasî, azadiya mafê mirovan û tesîsa edeletê ya civakê

* Ji bo nasnameyek hevpar a siyasî, wekheviya hiqûqî û ewlehiya azadiyê avakirina makeqanûneke nû

* Ji bo tevlibûna jiyaneke civakî û siyasî, hawireke siyasî bê avakirin

* Hemû şopên rejîma OHAL'ê bên paqijkirin û hemû kuştinên kiryar nediyar bêne zelalkirin û her wiha pergala cerdevaniyê bê rakirin

* Pêşî li sedemên koçberiyê bêne girtin û pêşî bandora aborî, siyasî, civakî û psîkolojî bên girtin

* Hemû herêmên bi mayîn bila demildest bên paqijkirin

* Li welatê me hemû rasiyên wekî dîrok û sosyolojî bêne qebûlkirin û mafên gelan bêne teslimkirin

Ji DÎHA'yê hatiye girtin