Diyarname

Îrfan Amîda ji destpêka salên 90'î ve bi kurdî re eleqedar e, dinivîse... Qedr û dîmeteke wî ya mezin heye di nav nivîskariya kurdî de. Em vê hefteyê wî dikin mêvanê Porteya Mehê...

Îrfan Amîd di sala 1968’an de li gundê Qesrê yê bi ser Mêrdînê ve ji dayîk bûye. Wî  Beşa Dîrokê ya Zankoya Dîcleyê xwendiye û bûye mamoste. 

Îrfan Amîda di sala 1991'ê de li  NÇM’yê (Navenda Çanda Mezopotamyayê) li ser çand û folklora kurdî dest bi xebatê kiriye û dema kovara Rewşenê derketiye ew yek ji kesên ku karibûye bi kurdî têde binivîse bûye û nivîsiye. Piştî çend hejmarên pêşî vegeriyaye Mêrdinê lê têkiliya wî bi Rewşenê (paşê Jiyana Rewşen, Rewşen-name û dûre kovarên din) re qut nebûye. Nivîs û helbestên xwe yên pêşîn di van salên pêşîn ên 90'î de nivîsandine û weşandine. Heta salên 2000'î ev xebata wî dom kiriye lê pêşî di sala 2002'yan de wekî yekem pirtûka wî helbestên wî gihîştine ber destên xwendevanan: "Dîmenên Derizî" (Weşanên Sî, 2002). Û dûre pirtûkên wî yên din derketine.

Heta niha ji Rewşan, W,  Azadiya Welat, Evrensel, Ozgur Gundem bigire di gelek weşanên çapkirî de nivîs û helbestên wî hatine weşandin. Her wiha wî gelek gotar ji bo Diyarnameyê jî nivîsîne û ew hatine weşandin.

Amîda li Mêrdînê dijî, ligel nivîskariya xwe demek Serokatiya Egîtîm-Sena Mêrdînê jî kiriye.

Nivîskar Îrfan Amida di sala 2014’an de di Zankoya Artukluyê, Beşa Ziman û Çanda Kurdî de master kiriye.

Amîda gelek qîmetê dide kurdî û nivîsa kurdî û ji bo yên nivîskarên kurd wekî "gihayê hewşê" dibînin di gotarek xwe ya di Diyarnameyê de wisa nivîsiye: "Meseleya hewşê û giya jî mirov dikare di heman pêwendiyê de binirxîne. Heger dê mirov behsa hewşekê bike ji bo nivîskarên kurd, ew hewş kurmancî ye û têra xwe bi gul û kulîlk e. Dilê kê bibijê bila bê vê hewşê û wan gul û kulîlkan bêhn bike û ji fêkiyên wê bitahmîne. Ji xwe, kêm zêde, kesên/xwendevanên ku di vê hewşê de digevizin hene û cih jî heye, kî dixwaze bila bê bigevize. Tu kes nikare wan biqewirîne ji vê hewşê. Ji xwe dilê tu kesî jî tune ye wan biqewirîne. Meseleya me ne lêgerîna hewşeke din e. Mesele ew e ku dengê ji vê hewşê derdikeve, li hin hewşên din jî bê bihîstin. Heger ku nayê bihîstin a dengê ji vê hewşê bilind dibe, qels e ya jî pirsgirêka “bihîstinê” heye di hewşên din de. "

Heta niha ev pirtûkên Îrfan Amîda derketine:

Roman:

- Pêşangeha Sûretan, Weşanên Lîs, 2011

Helbest:

- Dîmenên Derizî, Weşanên Sî, 2002

- Nameyên Nabersivin, Weşanên Aram, 2003

- Şopa Neşûştî, Weşanên Lîs, 2005

- Zaremya, Weşanên Lîs, 2009

Werger:

- Balgîfa Mar / Yilan Yastigi, Murathan Mungan, helbestên bijartî, li gel Lal Laleş, Weşanên Lîs, 2007

Lêkolîn:

- Qonaxeke Modernîzma Kurdî Helbesta Tîrêjê, Weşanên Lîs, 2016