Diyarname
5 helbestvanên jin ên kurd ku her yek li ser axa parçeyeke kurdan hatine dinê di çalakiyekê de hatin cem hev û helbestên xwe pêşkêş kirin.

Fatma Savci di sala 1974'an de li Girêmîra ya Nisêbînê hatiye dinê. Di sala 1992'yan de ji ber bûyerên siyasî hatiye girtin û heta 2003'yan di girtîgehê de maye. Heta niha  du berhemên wê bi navê “Gulên Qasid” û “Xewnên Zîvîn” derketin.

Gulîzer di sala 1979'an de li Amedê hatiye dinê. Saglik Meslek Lisesi kuta kiriye û dûre jî  Zanîngeha Dîcle Beşa Mamostetiya Îngilîzî. Heta niha berhemeke wê b inavê  “Keziyên Jinebî” derketiye û ew li Amedê dijî.

Jana Seyda di sala 1976'an de li Amûdê hatiye dinê. Di salên 1990'an de helbestên wê di berhemên erebî û kurdî de hatine weşandin. Seyda ku ji erebî ji bo kurdî wergerê jî dike li Stenbolê dijî. Heta niha ji bilî yek werger, ev berhemên wê derketine: "Şeva Dawî”, “Destê Sibê Deriyên Nîv Vekirî yên Evînê”, “Ber Êvarî”.

Kejal Ahmed di sala 1976'an de li Kerkûkê hatiye dinê. Dîplomaya xwe ji Peymangeha Hunerî ya Silêmanî beşa Parêzgarî wergirtiye û xwendina xwe temam kiriye. Ahmed digel xebatên lêkolînî yên li ser jinan ew ji sala 1992'yan ve karê rojnamegerî jî dike. Heta niha helbestên wê ji bo almanî, erebî, farisî, îngilîzî, norvecî û tirkî hatine wergerandin û ew li Silêmanî dijî. Kejal Ahmed ku bi soranî dinivîse ev berhemên wê derketine: “Bendrî Bermûda”, “Wutekanî Wutîn”, “Qaweyek Legel Ew da”, “Awênem Şikand”.

Nahîd Huseynî di sala 1967'an de li gundê Seqizê li Dozexderê hatiye dinê. Ji 18 saliya xwe ve dest bi nivîsandina helbestê kiriye, heta niha çîrok nivîsandine û li Sinê û lîstek zaroka ya şanoyê bi navê "Beqê Nav Avê" pêşkêş kiriye. Huseynî ku bi soranî helbestên xwe dinivîse, karê rojnamegerî û dublajkarî dike li Tirkiyeyê bi navê “Şevek bi şeytên re” pirtûkek wê bi kurmancî derketiye.

Ji parçeyên cihê berhemên ev pênc helbestvanên jin ên kurd ji Weşanên Avestayê di bin beşa "Şahmaran" de derketin. Avesta ku di bin navê "Şahmaran" de helbest û çîrokên nivîskarên jin ên kurd diweşîne vê carê bi hevkariya Anadolu Kultur, Balyozxaneya Stenbolê ya Swêdê û BEKSAV ev 5 helbestvanên kurd di bin navê "Ji 4 welatan şaîrên jin ên kurd tên ba hev" anîn ba hev.
Çalakiya yekem a vê xebatê di 20'ê mehê de li Amedê li dar ket û ya duyem jî li Stenbolê, li Depoya Titûtê ya li Tophaneyê li dar ket.
Çalakiya ku ji aliyê Rûken Bagdu Keskin ve hate bi rê ve birin helbestvanên jin ên kurd Fatma Savci, Gulîzer, Jana Seyda, Kejal Ahmed û Nahîd Huseynî helbestên xwe ji bo temaşevanan xwendin û şanoger Julide Kural jî tirkiya helbestan xwend.
Keskin got ku heta niha di projeya “Şahmaran”ê de 12 berhemên nivîskarên jin ên kurd derketin û wiha dom kir: "Projeya Şahmaranê piştgirî da jinan û her ku diçe  jin zêdetir dosyayên xwe dişînin. Wekî gotina Jana, di vê projeyê de jinan ji xwe re welatakî mê dît." Keskin dûre da zanîn ku di nav projeyê de wekî yekem berhem pirtûka Jîla Huseynî ku di sala 1996'an de jiyana xwe ji dest daye derket û ji bo bîranîna wê helbesteke wê xwend.
Rûken Bagdu Keskin piştî xwendina helbestê got, "Helbestên Jîla nazik in û ew di helbestê de her gazinê dike" û mafê gotin û xwendina helbestê da Kejal Ahmed.
Kejal Amed got; "Helbestên min ji bo şeş zimanan hatin wergerandin, lê xeyala min ew bû ku helbestên min li bakurê Kurdistanê bêne weşandin. Ez gelek kêfxweş im ku helbestên min li vir hatine weşandin û ez li vir im" û dûre dest bi xwendina helbestên xwe kir. Paşê bi rêzê  Jana Seyda, Fatma Savci, Gulîzerû Nahîd Huseynî helbestên xwe pêşkêşî temaşevanan kir.
Para sêyem a çalakiyê îro saet 17'an de dê li BEKSAV'ê li dar bikeve

Foto: Cemil Oguz