Nenas Hîçistanî

Ez tim li benda te me. Di her mirovî de li te digerim. Tim hilma te li ser min e. Di her giyanewerî de bêhna te seh dikim. Ji bo nasîna te pênase her tim qels û lawaz dimînin. Di her bûyera mîstîk de tu difûrî. Her gav bi min re yî, lê di heman demê de li tu derê nîn î. Ew çi rewş e? Xeletî û çewtiyek heye lê çi ye, nizanim. ‘Xwedê û wext xelet hatiye xitimkirin’*…
Di mîtolojiyan de li rastî te têm, lê ez dibim Sîsîfosê cezakirî. Di ol û dînan de pêrgî te têm lê tofana xwedê bi ser min de tê. Çi bikim, çare nîn e. Dixwazim te birisînim li ser kaxiza simspî lê her peyv dibe tîr û di te de diçikin, dibim kujerê te. Hemû hewldanên min beyhûde dimînin. Lê dîsa jî hewl didim xwe da ku te bibînim. Bi hêviyên biçûçik be jî dîsa li şopa te digerim. Bi baweriyeke pêxemberî te dişopînim.
Delodîn dibim ji ber nebûna te. Hebûna min li min diherime bêyî te. Mirin ji min re dibe tirs, her ku ew nêzîk dibe hêviyên min ên ji bo dîtîna te kêmtir dibin. Neçarî û bêgavî hevalbendiyê ji min re dikin. Gelo hîsa lêgerîna te ji ku tê? Kêmasiya te çi çax dest pê kir. Hîç nizanim.
Di dil de valahiyeke balûpal heye. Di hîçistana dilî de hîç aramî nîn e bêyî te. Hîsa kêmasiya te ez dorpêç kirime. Her cih bêyî te li min dibe biyanistan. Her mirov li min dibin şêrên êrîşkar û ez jî dibim karxezala revok. Bêyî te ez dibim peyva ku di ferhangan de cihnegirtî. Bêyî te wekî dinyaya bê roj im. Bi kurtebirî bêyî te her tişt kêmasiyan diwelidîne ji min re…
Kafirbavê de were, porkurê de were! Ma bes nîn e? Min guneh nîn e, ew qas xwe ji min vedişêrî? De were di hîçistana dilê min de konê xwe vegire. Were bibe mêvana min û ez jî bibim mazûvan. Were rabirdûyê, îroyînê û dahatûyê li min bike kêliyekê. Kêliyeke wisa ku di xwe de her tiştî bihewîne. Şikefta xwe ji min re veke da ku ez bi agirê Prometheusî bikewimê û tê de dîroka mirovahiyê ronî bikim. De were sedêbavê!...
Dîsa ez tik û tenê dimînim. Her der xikûxalî dimîne. Li min dibî Godot.** Hebûna min li min dibe bar. Tu hew tê…

*Rênas Jiyan (Janya)                                                                                  
** Samuel Beckett (Un Attendant Godot)

ciyanakli@hotmail.com

***

Nivîsên Nenas Hîçistanî yên ku berê di Diyarnameyê de hatine weşandin:

- Dil ji min bir talan*
- TU
- Zimanê Bindestî
- HÎÇÎSTAN