Amed
Piştî YOK'ê daxwaza Kurdolojiyê ya li Zanîngeha Dîcleyê Baroya Amedê bi gotina 'terorîstî' red kir, Baroya Amedê îro daxuyaniyeke da, ev yek şermezar kir û got: "Parastina mafên mirovan, ronîkirina bûyerên tarî û xwestina azadiyê terorîzm be, erê em terorist in."

Baroya Amedê par ji bo "Beşa Kurdolojiyê" û "Zimanê Kurdî" li Zanîngeha Dîcleyê vebe serî li rektoriya zanîngehê dabû. Zanîngehê ev daxwaz ragihand YOK'ê. YOK'ê bi gotina, "Daxwazek terorîstî ye" ev daxwaz red kir.
Li ser vê yekê Baroya Amedê îro li ber Edliyeya Amedê daxuyaniyeke da çapemeniyê û  helwesta YOK'ê şermezar kir.
Serokê Baroya Amedê Mehmet Emîn Aktar ku daxuyaniya baroyê xwend wisa got: "Daxwaza 'Enstituya Zimanên Dijîn' li Zanîngeha Artûklûya Mêrdînê tê qebûl kirin, lê daxwaza Baroya Amedê ya 'Beşa Kurdolojî' ji aliyê YOK'ê ve tê redkirin. Cîgirê Serokê YOK'ê ku li pêş navê wî Prof. heye û hiqûqnas e Baroya Amedê wekî 'Terorîst' îlan dike. Ger ku parastina mafên mirovan, ronîkirina bûyerên tarî û xwestina azadiyê terorîzm be, erê em terorist in. Em wekî baro vê helwestê bi awayekî tund şermezar dikin."

Aktar, bang li hemû baroyan û Yekîtîya Baroyên Tirkiyeyê kir û xwest li hemberî vê helwesta YOK'ê bê deng nemînin.