MÛRAT KÛSEYRÎ / ANF / STOCKHOLM

217 endamên meclisa şaredariyê û şaredarên Swêdê yên ku li cihên cuda peywira xwe didomînin, ji bo hikumeta Tirkiyeyê nameyek şandin û nerazîbûn nîşanî êrîşên li ser kurdan û aliyên demokratîk dan.

Di nameyê de hat xwestin ku şaredarên kurd serbest bêne berdan û peywira xwe bidomînin. Cîgira Şaredarê Stockholmê Ann-Margarethe Lîvh ji Ewropayê xwest ku helwesteke zelal nîşanî Tirkiyeyê bide.

Name ji Serokwezîrê Tirkiyeyê Bînalî Yildirim û Wezîrê Karê Hundir ê Tirkiyeyê Suleyman Soylu re hat şandin. Di nameyê de hat destnîşankirin ku piştî 7’ê pûşpera 2015’an HDP bi pêş ve çû û AKP’ê dest bi êrîşan kir.

Rêveberên şaredariyan diyar kirin ku 156 şaredar ji peywira xwe hatine dûrxistin û gelek şanoyên bajêr, navendên jinan û navendên çandî hatine girtin.

Rêveberan bal kişand ser êrîşên li dijî HDP’ê û got, “Tirkiyeyê pêvajoya aştiyê da sekinandin û pêşiya bûyerên erênî yên li şaredariyan girt. Agirbest hate bidawîkirin û li gelek bajaran şer hat destpêkirin, bi sedan kesên sivîl hatin qetilkirin.” Şaredarên Swêdê xwestin ku şaredar û rêveberên şaredariyan ên girtî serbest werin berdan û peywira xwe dîsa bidomînin.

‘Em bê deng namînin’
Cîgira Şaredara Stockholmê Ann-Margarethe Lîvh li ser mijarê got, ew gelek caran çûye Kurdistanê û bûye şahida serketina şaredarên Kurdistanê û wiha got: “Li dijî girtina şaredaran em ê bêdeng nemînin. Em bi vê nameyê diyar dikin ku em vî tiştî qebûl nakin û piştgiriya me ya ji bo hempîşeyên me wê bidome.”

Lîvh têkildarî vê meseleyê hikumeta Swêdê û Yekîtiya Ewropayê (YE) rexne kir û got, “Hikumeta Swêdê û Yekîtiya Ewropayê nerazîbûneke qels nîşanî binpêkirina mafan li Tirkiyeyê û Kurdistanê didin. Hikumeta Almanyayê nerazîbûneke tund nîşanî girtina hemwelatiyên Almanyayê da. Divê Hikumeta Swêdê û YE jî nerazîbûneke tund nîşanî Tirkiyeyê bidin.”

Di nava 217 şaredar û endamên meclisa şaredariyê de endamên Partiya Karkerên Demokrat û Sosyal, Partiya Çep, Partiya Lîberal, Demokratên Xirîstiyan, Partiya Mûhafazakar hene.