Diyarname
Festîvala Fîlman a Antalyayê pêşî tehamulê belgefîlman nekir, dûre Pêşbaziya Neteweyî rakir û niha jî bi sansurê di rojevê de ye.
54'emîn Festîvala Fîlman a Antalyayê bi nîqaşa di navbera amadekarên festîvalê û sînemageran de îsal her di rojevê de bû, ji ber ku amadekaran beşa Pêşbaziya Neteweyî betal kiribû. Loma jî di serî de Siyad, gelek sînemageran festîval protesto kir. Lê ligel vê yekê jî festîvalê dest pê kir û îro nîşandayîna belgefîlmê derhêner Ai Wei Wei ê bi navê "Human Flow" (Herikîna Mirovan) hebû. Derhênerê çînî Ai Wei Wei di belgefîlmê xwe de li ser koça mirovan disekine. Ew 65 mîlyon mirovên ji ber şer, birçîbûn û guherîna kişwerê warên xwe berdane û çûne cihên din digire dest. Fîlm ligel Afganistan, Bangladeş, Fransa, Yewnanistan, Almanya, Macaristan, Iraq, îsraîl, Meksîka, Pakistan, Filistîn, Sirbistan û Sûriye li Tikriyeyê jî hatiye kişandin. Fîlm dema di çarçoveya festîvalê de dihat nîşandayîn di deqîqeya 60'î de di jêrnivîsê de peyva "gerîla" derbas bû û qiyamet wê deqîqeyê rabû. Gelek resî bertek nîşan da, gelek rabûn çûn û kurtedemek bê jêrnivîs fîlm hat nîşandayîn paşê ew jî çû. Rayedarek hat gotin "xetayeke teknîkî heye, em bi vî awayî nikarin bidomînin" û dawî li fîlm hat.
Rayedarên festîvalê piştî vê yekê daxuyanî dan û îdîa kirin ku ji Londonê kopyaya şaş ji wan re hatiye şandin.
Derhêner Ai Wei Wei îsal Xelata Hrant Dînk a Navneteweyî jî girtibû.

Ji 2014'an ve sansurkar e
Ji sala 2014'an ve Festîvala Fîlman a Antalyayê bûye meseleya nîqaşê. Wê çaxê fîlmê belgefîlmê Reyan Tuvi "Yeryuzu Aşkin Yuzu Oluncaya Dek" ji bernameya pêşbaziyê derxistin û li hemberî vê yekê gelek sînemagerî deng derxist. Ji ber belgefîlm û kurtefîlm piranî li ser meseleyên nav Tirkiyeyê bûn sala dûre pêşbaziya belgefîlman û kurtefîlman ji festîvalê hat derxistin û îsal jî festîvalê biryar girt ku Pêşbaziya Neteweyî li dar nexe.