Diyarname
Ji şoreşa Rojava ya ku di 19'ê tîrmeha 2012'yan dest pê kir heta niha gelê li rojavayê Kurdistanê ligel gelek qadan dest avêtiye aboriyê jî. Pergala li wir saz bûye bi ser kooperatîfan re dimeşe.
Li gor nûçeya Ajansa Hawarê (ANHA) Rojava jî di nav de  heta niha li herêmên federaliya demokrastîk a bakurê Sûriyeyê zêdetirî 142 koperatîfan hatine avakirin. Armanca koperatîfan jî ew e ku malgirtin û keysbaziya di bazaran de tune bikin û dengeyeke di bazaran de ava bikin. Di dema ku herêmên Bakurê Sûriyeyê bi ambargoyeke giran re rû bi rû bûn, welatiyan bi alîkariya saziyên têkildar ku di dema şoreşê de hatibûn avakirin koperatîfên xwe avakirin û bipêşxistin.

6 hezar kes beşdar bûne
Li gor nûçeyê di kopertîfên herêma Cizîrê de li gorî serjimarên Yekîtiya Koperatîfan a Rojava 3080 malbat cihê xwe girtine.
Nûçe dibêje ku Komîteya Bazirganiyê madeyên xwarinê, zibil, çimento, hesin bi alîkariya koperatîfa “Hevgirtin” bi buhayeke erzan peyde dike. Di vê koperatîfê de jî bêtirî 6000 kes ên herêma Cizîrê beşdar bûne. Heta niha hejmara koperatîfên li herêmên federaliya demokratîk a Bakurê Sûriyê hatine avakirin bêtirî 142 ne. Li herêma Cizîrê 87 koperatîf, li herêma Efrînê 21 koperatîf, li herêma Feratê 34 jî koperatîf hene.

Li herêmên din jî têne avakirin
Hevseroka Yekîtiya Koperatîfan a Herêma Cizîrê Nebîle Mihemed gotiye ku niha gelek koperatîf li herêmên nû hatine rizgarkirin tên avakirin, ên wekî Reqa, Tebq û Dêrazorê.