Îhsan Bîrgul

Em bi pirsekî destpê bikin. HDP partiya gelan e an ya kurdan e? Eger partiya gelan be divê em vê pirsê bipirsin; Madem partiya gelan e, çima hemû enerjiya kurdan di nav HDP'ê de tê xerckirin?
Ji bo pirsa me baş bê fam kirin em çend mînakan li nivîsê bikin. Li gorî rêziknameyê wê HDP wekî şîrketeke kollektîf e. Lê yê dengê xwe didin sedî nodî zêdetir kurd in. Xebatên wê yê rêxistinbûnê herî zêde li Kurdistanê xurt in. Partiya BDP'ê hate pasîfîzekirin ji bo xurtkirina HDP'ê. Mînaka herî berbiçav israra mezin ya ji bo ku birêz Demirtaş ji serokatiya BDP'ê derbasî ya HDP'ê bû. Çimkî Demirtaş nedixwest, heta niyet hebû di kongreya bê de dev ji serokatiya partiya xwe jî berde. (balkêş e ew israra wî çaxê îro ji bo ji nû ve serokatiya Demirtaş tune bû. Te digot qey li benda biryareke wiha bûn).

Ύro tu lê dinihêrî, partî ya "gelan" e lê cerema wê kurd dikişînin. Yanî barkêş kurd in. Baş tê bîra min, di hilbijartinên 2007'an de hema hema her roj em nêzî 40 kesî derdiketin xebatên taxan. Ji wî çil kesî sê, çar kes ji partiyên din bûn, yê mayî em bûn. Min qet nedît tu evdekî Xwedê ji bo xatirê wan "gelan" dengê xwe dan. Yên xebitîn jî kurd bûn yên dengdayî jî. Hilbijartin qediyan em bi serneketin lê yên herî zêde axivîn ew bûn. Yanî dîsa yên neheq netewa kurd bû...

Em kurtekevanekî jî ji bo Perwîn xanimê vekin. Ya sazî û dezgehan digihîne mîsyon û armanca vîzyon e. Û her wiha rêberên xurt û xwedîferaset..
Bişarê Çeto û Gulê wexta dikevin qirika hev, Bişar di cihekî de wiha dibêje: "min qencî û xirabiyên mala bavê te avête terazî û mêzînê lê tu qenciya wan nekete bîra min". Em xwe biçirînin jî ji bo vîzyonê tu tiştekî Perwîn xanimê tune û nakeve bîra me (ji bilî kurdiya wê ya xweşik û herikbar!!!)...

Em dîsa xwe biavêjin ber bextê biwêjekî. Jinik dibêje mêrê xwe "eger tu li ser min bizewicî, ez ê jî bi neyarê te re birevim". Ύcar ya me jî bûye ew mesele. Gotin weey hûn serokekî tirk naxwazin, ha ji were bersiv... Em bi Sirrî Sureyya ya qayîl nedibûm, malmîrata Sezaî û Perwîn dane ser serê me. Sezaî bû bar, Perwîn jî serbar li ser pişta kurdan ya xûzbûyî...
Ha eger hûn bêjin HDP partiya kurdan e wê çaxê tenê gotinek di destê me de dimîne "axayê me bû bilbil, xwerê me bû bişkul"...