Jana seyda

                       Ji bo Cuneyt û zarokên weke wî

Zarokek bûm, min dixwest kêlîkekê çavên qederê (bi awirekê be jî) li ser birîna xwe ya vekirî ji berî sedsalan de vekim..

Kor e çavên qedera min..
Kor e çavên xwedayê min..

Xwedêyo
Ewrek di destê min de bû, balgeha min î zîvîn bû
Dem hat û di Newrozê de
Ji destê min şemitî
Hezar baran di çavên min de hiştin..

Hêrsên min nebîne ey Xweda
Ez ê negrîm
Bayê Geverê çiqas hişk bû ku ez giryandim!!
Bayê azadiyê çiqas xurt bû ku ez giryandim!!

Rengê çavên te çi ne?
Û çi reng ji kenê te re heye?

Kor e yê kenê min nabîne
Û yê dîlana giyanê min wernagire

Kor e ev dem
Milê min yê min e, dê kî ji min bitsîne?

Vê buharê
Ez ê çûkan azad bedrim û bi tebeşîrê bişrîna rojên sitembar xêz nekim!
Dê li ser defterên dibistanê awirên xwe bihêlim
Û li ser depreşê di xew ve herim..

Vê buharê
Ez ê bennikên soleke xwe girê bidim û ya dî vekirî bihêlim da ku neçim nêçîra perwaneyan
Û guleke Beybûnê ji diya xwe re neçinim

Sibeha te bi xêr dayê
Bibûre ez ê nanê germ  ji te re nekirim
Piştî ku milê min şikandin
Ez ê dilê xwe di taştiyan de ji te re bipijînim..
Dayê
Ma bi destekî tenha sibeha xembariya te tê nivîsandin?

Vê buharê
Ez ê li ser banê mala me stêrkan nejimêrim
Destek têra jimartina stêrkên revînok nake..
Dê silavê li ezmanê sayî nekim..
Silav Geverê..
Bila kor bibe çavên çiyayên te..
Ez ê li kolanên te dîn nebim
Û milê xwe yê din li qorzîkên sikakên te bihêlim
Da sêwî nemînin lîstok

Kor e ev dem
Milê min yê min e, dê kî j imin bitsîne?

Kor e çavên te Xwedêyo
Çawa bi rexekî tenha ayetên firişteyan di cenneta te de bixwînim?

Vê buharê
Ez ê neçim jivana kulîlkan, ne jî di havînan de li taveheyvê ewle bibim û li axa ber deriyê hewşê!

Zarokek bûm, min dixwest di Newrozê de şekirê cejnê bicivîn û agirekî ji perwaneyên dilê xwe re vêxînim..

Lê ez ê di Newroza ku dê were de
Bi heman destî siya xwe bitewînim û alekê hildim
Bi milekî şikestî aleke sipî hilnadim
Şerm e ku bi destekî biçim pêrgîna aştiyê!!

Dê ala min kesk be weke xewnan
Soooooor be weke êşê
Û zerrrrrr be weke simbilê zadên dîrokê..

Dê ala sipî bi hman destî bilind nekim
Êdî ketiye ji ferhenga nermebê
Ew rengê beloq..

Bibûre Gever
Ez ê nema li berfa te jî temaşe bikim
Êdî sipî rengekî şikestiye
Weke milê min.!

Dê nema bibînim wî rengê têkçûyî
Di kincên serbazên têkçûyî de
Li ber keskesorên çiyayên dûr

Tu jî dê nebînî ey Xweda
Êdî rengê berfa min jî
Sooooor e….

janaseyda@hotmail.com