ELÎ DAPAR / MELLE

Li nehiyeya Melle ya Almanyayê, şeva piştgiriyê ji bo Hozan Dilgeşê ku rûyekî nasraw ê muzîka kurdî ye û yê ku nexweşiya şekir pê re heye hate lidarxistin. Di şevê de, ji ber tevkariyên li muzîka kurdî kirî, du plaket dane Hozan Dilgeş.

Şeva piştgiriyê bo Hozan Dilgeşê ku bi saz û awazên xwe di Têkoşîna Azadîxwaz a Kurdistanê de xwe dayî hezkirin hate lidarxistin. Di şeva piştgiriyê ya ku ji aliyê Platforma Hunermendên Kurd ên Êzidî (PHKE) û Tev-Çandê ve li nahiyeya Melle ya Almanyayê hate birêvebirin de, gelek hunermend û bi sedan kes amade bûn.

Şevê bi deqiqeyek rawestana rêzgirtinê dest pê kir û li ser navê PHKE’yê axaftinek hate kirin. Di axaftinê de, hate gotin, bi qasî ku têr bike, em xwedî li hunermendên kurd dernakevin, paşê wiha hate gotin, “Em minetdarên Hozan Dilgeş in ku xwe fedayê gelê xwe kiriye û em gihandine vê astê”.

Hozan Dilgeş di dema selteneta keyayan de, bi strana li ser keyayan gotî, strana “Lo Mixtaro”, xwe kiribû hedef û hate gotin, “ji ber ku di têkoşîna kurdan de Hozan Dilgeş bûye çirayek ji bo me, em spasî wî dikin”.

Tev-Çandê jî, ji ber bi salan e xizmetê ji çanda kurdan re dike, wî dide jiyandin û ji bo ku xwe kiriye rêgezeke jiyandinê, Hozan Dilgeş pîroz kir û banga xwedîderketinê li hunermendên ku ji ber hunera ku çêkirine bûne hedef hate kirin.

Hozan Xelîl Xemgîn jî bal kişande ser xebatên ku bi Hozan Dilgeş re di binê banê Hunerkomê de bi salan meşandine û bi vî awayî balkişand ser xebatên wê demê: “Hozan Dilgeş bi salan e bi derzî û dermanên xwe, ji şevekê beziya şeveke din. Xwarina wî di çenteyê wî de, li ser riyan bû. Wî berjewendiyên xwe yên kesî her dem dixist rêza duyem. Wê hingê hunermendên kurd kêm bûn û ji bo hemû şevan bi bez diçû. Dilgeş bi wê rewşa xwe ve tu şev bernedida û digot, 'Ez ê li gel gelê xwe cî bigirim'."

Xelîl Xemgîn got, “Bi armancên siyasî em nebûne hunermend, em bûn kedkarên gelê xwe” û wiha berdewam kir, “Ji bo ku tu bibî hunermend, divê gel te qebûl bike. Ev erêkirin ji bo Dilgeş hatibû dayîn.”

Di axaftinên ku ji aliyê Carcûr Cemalê ji Yekîtiya Êzidiyên Kurdistanê, Serokê Meclisa Gel a Bielefeldê, Tahir Koçer û rojnamevan Kakşar Oramar ve hatin kirin de, ji ber xizmetên Hozan Dilgeş ew pîroz kirin û daxwaz hate kirin xwedî li hunermendan derkevin.

Di şevê de, Koroya Zarokan a Bielefeldê, Îdris Bago, K. Rizgar Bişar, Şemdîn, Başo, Xemdar, Peywan, Xelîl Xemgîn, Melek, Xemgîn Bîrhat, Seydxan, Cewat Merwanî û Kawa bi stranên xwe şev xemilandin.

Di şevê de Hozan Dilgeş axaftinek kir, spasiyên xwe pêşkêşî kesên ku tevî şevê bûne kir û wiha got: “We ez pir bextewar kirim. Ez pir kêfxweş bûm. Em malbatek in. Divê em hêza xwe kom bikin û bibin yek. Di vê têkoşînê de, gelek hunermend şehîd ketine. Em kurd di wê pêvajoyê de bê tecrube bûn, me nezanî em xwedî li nirxan derkevin. Ji ber vê şeva piştgiriyê ez pir kêfxweş bûm. Di sêrî de li PHKE û Tev-Çand’ê, ez spasî we tevan dikim”.

Di şeva ku Mîr Muzîkê tacegul şandê de, ji aliyê PHKE û Tev-Çand’ê ve, her yekê, ji ber xebatên Hozan Dilgeş plaketek dane Hozan Dilgeş. Dilgeş coş û xuroşa xwe nekarî veşêre, li ber çepik û diruşman plaketên xwe wergirt.

Hin ji stranên Dilgeş ev in: Biçûkê Canê, Lê Xin Gerîla Lê Xin, Bêrîvanê, Nisêbîn, Egîd Bi Heybet, Mixtaro, Şerê Bagokê, Axa Me Zêr û Zengîn.

Şeva piştgiriyê bi stranan û dîlanê heta derengiya şevê dom kir.

Ji ANF'ê hatiye girtin