Diyarname

Li metropolên Tirkiyeyê bajarên ku dê HDP di hilbijartina 31'ê adarê de berendaman nîşan nede û li cihên ku dê nîşan bide diyar bû.

Li gor nûçeya Selman Guleryuz a di Ajansa Mezopotamyayê de HDP'ê biryar daye ku li 7 Bajarên Mezin berendaman nîşan nede. Di nav van de Stenbol, Enqere, Îzmîr, Mêrsîn û Edene hene. Ligel van li Riha û Entabê jî berendaman nîşan nade. Ji bilî bajarên mezin li hin bajarên Tirkiyeyê dê li navçeyan berendaman nîşan bide. Li Stenbolê dê li Şîşlî, li Mêrsînê dê Akdenîzê ku li her du cihan jî girseya HDP'ê xurte dê berendaman nîşan bide. Jixwe Akdenîza Mêrsînê di destê HDP'ê de bû lê hikumetê bi kayûmê dest danîbû ser wir jî.

Li Konyayê jî HDP heye

Her wiha li Konyayê ligel Şaredariya Bajarê Mezin dê li navçeyên wekî Cîhanbeylî, Kulu jî berendaman nîşan bide û ji bo navçeyên din ên Konyayê hê di nav nîqaşê de ye.

Li Egeyê jî li Aydin, Mugla, Balikesir, Manîsayê dê li hin cihan HDP bi berendamên xwe bikeve hilbijartinê.