Diyarname

Emsar hetê fûtbolî de heyecano pîl Îngilistan de bî. Heftey 38'inan, yanê heftey peyîn hamey la hema şampiyon eşkera nêbiya û eyro eşkera bî:  Macnhester City (MC).

Di Premier Lîg a Îngilistanê de eyro maçê peyînî hamey kaykerdişî. Di rêzey joyîn de MC, di rêzey diyin de Liverpool bibînî la ferqo miyanê yînan de tenî pûanêke bî. Heyecan dewam kerdê û di enî heyecanî dî MC şîbî Brighton, Liverpool kê xo de Wolverhampton kerd bî meyman. Liverpoolî bi 2-0 maçe girote la feyde nêda, çimkî lîderî bi 4-1 maçe girote û şampiyonî xo eşkera kerd.

Di peynî 38 hefteyan de MC bi 98 pûanan bî şampiyon, Liverpool bi 97 pûanan rêza diyin de mende. Chelsea kewte rêzey hîrinan, Tottenham jî di rêzey çarinan de ca girote ke enî her çar tîmî serey vernî ma de derbasê Lîgey Şampiyonan benê.

Tîmê MC di serey 1880 de bi namey "St. Mark's" hamî viraştişî, serey 1887 de namey xo kerd "Ardwick Association Footbal Club" û serey 1894 de namey xo kerd Manchester City. MC di seranê peyînan de, dimay ke Pep Guardiola bî teknîk dîrektor lez da xo û raver şî. Bî di rey di binê teknîk dîrektorî Pep Guordiola de bena şampiyon. Di dîrokey xo de MC çar rey biya şamyion. MC par bi 100 pûani bîbî şampiyon û rekor şikit bî.

Tirkiya de tîmê hamey û şî

Di Lîgey Super a Tirkiya de maçê heftey 32'yinan hamey kaykerdiş. Akhîsar de hemberî Fenerbahçe bi 2-1 kerd vinî di pûanê 25'inan de mend. Di heftey mendo lîg biqediya la hêvî Akhîsarî de ke lîg de bimano nê mend û lîg ra kewt. Sera bê go Akhîsar Lîga 1'yin de kay bikero.

Lîgo 1'yin ra jî di tîmê ke go bêrê Lîga Super eşkera bî. Di enî lîgî de maçê heftey 33'an hamey kaykerdişî û heftey vernî ma maçî qedênê. Gençlerbirligi bi 70 pûanan di rêza joyîn, Denîzlî bi 69 pûanan di rêza diyin de ca girot û wirdî heqê derbasbiyayişê Lîgê Superî girotî. Serey vernî ma wirdî tîmî go Super Lîg de bê. Tîmo hîrin jî dimay maçanê Play-Offî go eşkera bibo.