Wan
Li navçeya Erdîşa Wanê, Şahvelat Kiliç (55 salî) ji 7 saliya xwe ve li ser hunera peykerê dixebite. Kiliç dibêje ku ew sembolên Med û Urartuyan bi peykeran di rojevê de dihêle.

Peykervan Şahvelat Kiliç dibistana seretayî qedandiye. Ev  48 salin li ser peykervanî dixebite û wî heta niha nêzî 200 peyker çêkirine û şandine bajarên wekî Stenbol, Antalya û hwd.

Kiliç, destnîşan kir ku ji ber xebatên xwe gelek caran
rastî bertekên neyînî hatiye û ji derdorê tu piştgirî negirtiye. Kiliç, bi bîr xist ku ji ber peykertraşiyê demekê ji aliyê meleyê gund ve rastî lêdanê hatiye û wekî "minafiq" û "putperest" nişan daye.

Peykervan Kiliç, da zanîn ku herî dawî di 2007'an de di Şaredariya AKP'ê ya Erdîşê de wekî karker xebitiye û ji kar hatiye derxistin. Kiliç, di hunera xwe de bi taybetî şopên Qralên Ûrartû û Medan ronî dike. Şahvelat Kiliç, destnîşan
kir ku li gel hemû pêkûtiyan xebatên xwe domandiye û dixwaze bi vê hunera xwe dîroka kurdan ronî bike.

Kiliç, der birî ku di 7 saliya xwe de dema li gund şivanî dikir, li çolê bi heriyê peyker çêdikir. Kiliç, daxuyand ku 48 sal in bi kêfxweşî û hezkirinê vê hunerê bi pêş dixe. Kiliç, destnîşan kir ku armanca wî ya sereke dîroka kurdan vekole û bi peykeran dîrokê ronî bike. Ew dibêje ku bi taybetî li ser şaristanên Ûrartû û Medan xebatên xwe dike û ji niha û şûnde xebatên xwe bidomîne.

Kiliç, bal kişand ser xebatên xwe û anî ziman ku ji 7 saliya xwe û heta niha nêzî 200 berhemên hunerî çêkiriye û wiha got: "Ez bi kevirên spî yên Erdîşê û Exlatê wêneyên nivîskî û fîgurên Ûrartû û Medan çêdikim. Sembolên hîyeroglîfa Misir, Anka, mar, kund, nivîsa mîx a Sumerê,  Gilgamiş û gelek hêmanên din çêdikim. Ez dixwazim berhemên dîrokî û navdarên li ser erdnîgariya kurdan bi peykeran zindî bikim." 

Şahvelat Kiliç, destnîşan kir ku ji zarokita xwe ve heta niha her kesî hunera wî pir eletewş dîtiye û di serî de malbatê hemû derdorê bertek nîşanî xebatên wî dane. Kiliç, anî ziman ku li gel hemû bertek û rexneyan dîsa bi biryar xebatên xwe dimeşîne.