Heskîf

Hunermendê navdar Tarkan wekî hezkiriyê Komeleya Xwezayê piştgirî da "Bila Heskîf Têk Neçe!" û çû Heskîfê.

Komeleya Xwezayê li Heskîfê jî ofîsa xwe vekir. Ji bo vekirina ofîsa komeleyê hunermendê popê yê navdar Tarkan jî çû Heskîfê û li wê derê deklarasyona bi navê "Bila Heskîf Têk Neçe" xwend.

Tarkan li Heskîfê geriya, bi gel re sohbet kir, dewê ku keremê wî kirin vexwar û egal girêdan.

Hunermend Tarkan got ku di nêzîk de bi organîzeyeke navneteweyî li Heskîfê konserê bide û di vê konserê de strana ku ji bo Heskîfê amade kiriye dê bixwîne.

Tarkan wisa got: "Em îro deng didin Heskîfê, şahidiya dengê dîrokê û îhtîşama xwezayê dikin. Di vê erdnîgariya tekane de, çivîk, nebat, kûsiyên Firatê, zinar û Newala Dîcle li me, li cihana ku diguhere temaşe dikin. Meraq dikin ku emê şopeke çawa li dirokê bihêlin."

Tarkan diyar kir ku Komeleya Xwezayê bi vekirina ofîsa xwe ya li Heskîfê alîgiriya xwe yo j ibo xweza û şaristaniyê diyar kiriye û got ku li dinyayê li her derê bendav zerarê derdixin holê.

Hunermend Tarkan got ku bendaj bi xwe re ziwabûn, mirin û koçê tînin û wiha dom kir: "Saziyên navneteweyî ku piştgirî didin vê projeyê ku dibe sedema têkçûna xweza û dîrokê, li welatê wan be qet dê xeyal jî nakin ku tişteke wisa bikin. Di vê rojê de ez bang li hunermend, zanyar, siyasetmedar û wijdana raya giştî dikim ku piştgirî bidin kampanyaya 'Bila Heskîf Têk Neçe' ya Komeleya Xwezayê. Tenê em dikarin xwedî li kokên xwe derên. Tenê em dikarin vê hêviyê bidomînin. Bila Heskîf têk neçe."

Li ser pirsên rojnamegeran jî Tarkan da zanîn ku Heskîf wekî muzeyeke servekiriye û bang li siyasetmedar, rewşenbîr û hunermendan kir ku guh bidin wêderê.

Foto: Mekiye GORENÇ / DÎHA