Diyarname

Fîlmê derhêner Mano Xelîl li Swîssre wekî Fîlmê Salê hat hilbijartin û hêjayê Xelata Fîlman a Bernê hat dîtin. Wekî xelat ew dê 30 hezar frank bigire. Derhêner Xelîl dibêje "Ez hêvî dikim kurd hê zêdetir eleqe nîşanê çîrokên xwe bidin."

Fîlmê Mano Xelîl "Cîran" heta niha ji Şengayê heta Kore, Locarno tevlî gelek festîvalên navneteweyî bû û ev du hefte ne fîlm di sînemayên Swîssreyê tê nîşandayîn. Heta niha ewropiyan eleqeyeke gelek mezin nîşanî fîlm dan.

Fîlmê metrajdirêj ê bi navê 'Cîran' behsa drama li ser sînorê parçekirî yê Kurdistanê dike. Çîroka fîlmî li gundekî li ser sînorê rojava û bakurê Kurdistanê derbas dibe.

Di dema darbeya leşkerî ya sala 1980'yî de zilma dewletê ya li ser kurdan, bandor li van gundên Rojava jî dike. Fîlm bi çavê zarokekî hem zilma Serxetê hem a Binxetê nîşan dide.

Fîlmê metrajdirêj ku gelek lîstikvanên navdar ên kurd û ereb anîne cem hev li Swissre hêjayê xelata Filman ya Bernê hat dîtin. Li paytexta Swîsre Bernê her sal Komîsyana Çandî fîlmê wê salê ku hatine nîşandayîn dinirxîne û ji nav wan xelatê dide wan. Fîlmê Mano Xelîl wekî fîlmê herî serketî hat hilbijartin û bi Xelata Fîlman a Bernê hat xelatkirin. Ji bilî "Cîran" du fîlmên din jî xelata duyemîn û sêyemînî girtin. Ji bo xelatdayîna Cîran xala ku herî zêde bala juriya xelatan kişandiye aliyê mîzahî yê di nava dramê de ye.

Derhêner Mano ji bo me got ku ew ji ber girtina xelatê kêfxweş e lê ligel ku fîlm li sînemayê ye, xelkê ewropî eleqe nîşan didin lê kurd kêm eleqe nîşan didin ew xemgîn e. Ew dixwaze kurd jî xwedî li çîrok^ne xwe derkevin.

Derhêner Mano Xelîl dibêje wan êşa kurdên li ser sînorê Rojava û bakurê Kurdistanê  hem bi awayekî dramatîk hem mîzahî kişandine û nêzî 3 mîlyon dolar mesref lê kirine.

Derhêner Mano Xelîl di dawî de wisa got: "Fîlmê me li cîhanê dengek mezin veda, heta niha tevlî nêzî 50 festîvalên navnetewî bûye, roja ku di medya cihanê de nûçe li ser neyê nivîsandin tune. Salonên sînemayê tije dibin lê mixabin di nava wan çavên min li kurdekî nakeve."
Li gor agahiya ku Xelîl da me di dema pêşiya me de fîlm wê li welatên wekî DYA, Kanada û Almanyayê jî bê nîşandayîn.