Ahmet Kanbal / MA

Kayûmê Şaredariya Qoserê navê parka ku ji bo bîranîna Parlamenterê DEP’ê Mehmet Sîncar di sala 2005’an de hatibû çêkirin, cara duyemîn guhert. 

Parlamenterê Partiya Demokrasiyê (DEP) yê Mêrdînê Mehmet Sîncar di 4’ê îlona/rezbera 1993’yan de li Êlihê hatibû qetilkirin. Ji bo bîranîna Sîncar di sala 2005’an de Şaredariya Qoserê parkek çêkiribû û navê wî lê kiribe. Qeymeqamê Qoserê ku wekî kayûm tayînî şaredariyê hatiye kirin cara duyemîn navê parka Mehmet Sîncar guhert. Cara ewil kayûmê Qoserê di sala 2017’an de navê parkê guhertibû. Piştî ku rêveberiya HDP’ê di hilbijartina 31’ê Adara 2019’an de şaredariyê bi paş de qezenc kiribû, navê Mehmet Sîncar dîsa li parkê kiribû. Vê carê kayûmê Qoserê yê niha Huseyîn Çam navê Mehmet Sîncar ji parkê bir û navê “Parka Tepebaşi” lê kir, tabela jî bi vî awayî daliqand. 

‘NIRXÊN GEL TUNE DIKIN’ 

Di deriyê yekemîn ê Parkê de navê Mehmet Sîncar û peykerê wî bêxwedî hat hiştin. Birayê Mehmet Sîncar, Alî Sîncar bertek nîşanî guhertina navê parkê da û got: “Kekê min mebûsê vî gelî bû. Li Êlihê hat qetilkirin. Meclisa vî bajarî ev biryar da û navê Mehmet Sîncar lê kir. Ji destpêka avakirina parkê ve navî wî lê kiribûn. Guhertina navê parkê me xemgîn kir. Mirov bixwaze nexwaze xemgîn dibe. Li ser navê nirxên gel çi hebe, ji aliyê kayûman ve tê talankirin û tunekirin. Gelê Qoserê îradeya xwe bijart, lê kayûm tayînî şûna îradeya xelkê kirin. Ji me re eşkere dibêjin, ‘hûn kî ne, em îradeya we nas nakin, em ê vir bi rê ve bibin, çiqas nirxên we hebin em ê tune bikin’. Me cihê dikin. Ji me re dibêjin, ‘hûn tune ne û em nirxên we binpê bikin’. Vê yekê tînin serê xelkê me. Tehamûla wan li hember navê Mehmet Sîncar jî nema ye. Ji me û nirxên me aciz in. Lê ew çi jî bikin, Mehmet Sîndar nirx û vîna gelê me ye.”