Diyarname

Malbata Arjen Arî û Weşanên Sor îsal 10’emîn car Pêşbaziya Helbestan a Arjen Arî li dar dixin.

Ji bo serdema nû ya pêşbaziyê amadekaran daxuyaniyeke nivîskî belav kirin û wisa gotin, “Pêşbazî ji bo xwedîlêderketina zimanê kurdî û wêjeya kurdî ye ku Arjen Arî di hemû jiyana xwe de bo wê kedeke muhîm da û bo xwedîlêderketina puxteyên hunerê yên navneteweyî ye.”

Di 10’emîn pêşbaziyê de nûbûnek kirine ku serketiyê par Yehya Omerî xistine nav juriya îsal. Li ser vê jî wisa gotine, “Ciwanên ku heya îro ji pêşbaziyê xelat wergirtine, her hewl dane li ser helbesta kurdî xwe bi pêş bixin. Yek ji wan jî (Yehya Omerî) ku par dîwana xwe ya duyem çap kir, bi mebesta sala 10’emîn di lijneya juriyê de cî digire. Ev, yek ji wan nîşaneyan e ku pêşbazî xizmeteke baş dike ji bo helbesta kurdî.”

Yên bixwazin divê heta 1’ê avrêla/nîsana 2023’yan dosyayên xwe bişînin ber destên amadekaran.

Juriya îsal ji Îrfan Amîda, Necla Arî, Lal Laleş, Zahir Kayan û Yehya Omerî pêk tê.

Şertên serîlêdanê bi vî rengî ne:

- Xelat dê bo berhemên bi zaravayê kurmancî hatî nivîsandin bê dayîn.

- Wekî xelata pêşbaziyê berhema ku bi ser bikeve dê ji hêla saziya ku vê pêşbaziyê li dar dixe ve, ji hêla Weşanên Sor ve bê çapkirin.  

- Her kesê ku heta niha berhemeke wî/wê ya helbestê nehatibe çapkirin dikare serî lê bide.

- Malbata Arjen Arî û Weşanên Sor dê bi hev re kesekî/ê ku ji bo parastin û pêşvebirina ziman û edebiyata kurdî kar û xebat kiriye hilbijêrin û “xelata giramgiriyê/xelata rûmetê” bidinê.      

- Berhemên ji hêla saziyek ve hatibe xelatkirin an di pêşbaziyekê de xelat wergirtibe nikare tevlî pêşbaziyê bibe.

- Berhemên ku tevli pêşbaziyê bibin divê bi alfabeya latînî hatibin nivîsandin.

- Mafê lijneyê heye ku di dema çapkirinê de li ser berhema ku xelat wergirtiye guhertinan bike.

- Heke jurî tu dosyeyê hêjayî xelatê nebîne dikare xelat nede.

- Dosyeyên ku ji bo pêşbaziyê bêne rêkirin divê di qabareya (hacm) pirtûkê de, 64 rûpel (4 form) bin. 

- Dosye divê di formata A4 de, 5(pênc) nusxe û bi USByek ku dosye tê de ye bê rêkirin. 

- Dosyeyên ku bi kompîturê nehatin dîzaynkirin û USByek pêve nekirî wê neyên nirxandin.

- Divê di dosyeyê de nav, nîşan an mexlas û hwd. ku xwediyê berhemê bide nasîn tune be. 

- Helbestvanên ku beşdarî pêşbaziyê bibin dê kurtejiyan, navnîşan û pêdiviyên bo têkiliyê di nav zerfeke devgirtî de rêbikin. 

- Encama pêşbirkê dê di 15'ê Gulana 2023'şan de, yanê roja Cejna Zimanê Kurdî bê eşkerekirin.

- Divê dosye bi kargo yan bi posteyê, bo vê adresê bêne rêkirin:

Pêşbaziya Helbestê ya Arjen Arî 

Yenişehir Mahallesi, Ali Emiri 1. Sk. Nuyap Plaza, Kat: 7, No: 46, Yenişehir/Diyarbakır

(li ser navê Songul Argunaga)

- Serlêdanên rû bi rû nayên qebûlkirin. 

- Dosyeyên ku bo pêşbaziyê bêne rêkirin li xwediyê wan nayêne vegerandin. 

- Endamên lijneya pêşbaziya helbestê ya Arjen Arî, dê piştî encamê bizanin ka xwediyê berhemên ku dengê xwe dane wan kî ne.

- Kesên xwedî berheman divê heya 1'ê Nîsana/Avrêla 2023'yan dosyeyên xwe bişînin.

- Pêwendî: 05434886996