Diyarname

Li Parîsa Fransayê êrîşê Navenda Çanda Kurdan a Ahmet Kaya kirin. Di êrîşê de 3 kes hatin kuştin. 

Li Parîsê, Navenda Çanda Kurdan a Ahmet Kaya bi salan e li Taxa Strasbourg Saint Denis e. Li gor agahiyên pêşî îro kesekî bi navê William M. bi çek êrîşê komeleyê kiriye. Di êrîşê de 3 kes hatin kuştin. Hat gotin ku kesên hatine kuştin navên wan ev e: Emine Kara, Mîr Perwer û Abdullah Kizildag. Mîr Perwer hunermend bû. Li gor agahiyên hatine 5 birîndar hene ku rewşa diduyan jê giran e.

Êrîşkar piştî kuştina van, baz daye kûaforek ku ew jî ê kurdan bû û li wir jî gule reşandine. Lê dema guleyên wî xilas bûne û xwestiye jerjûrê biguherîne yên li kûaforê ew qufaltiye û gazî polîsan kiriye. Tê gotin ku polîs heta 40 deqe nehatine.

Piştî bûyerê kurdên li Parîsê li kolanê hatin ba hev û bûyer şermazer kirin. Di nav bera çalakgeran û polîsan de pevçûn derket. 

Li ser kesên hatine kuştin hin agahî hatin belavkirin. Tê gotin ku Emîne Kara (bi navê xwe yê din Evîn Goyî) li Rojava li dijî DAIŞ’ê şer kiribû, yek ji serleşkeran bû. Piştî birîndar dibe diçe Parîsê. Hunermend Mîr Perwer yek ji xebatkarên TEV-Çandê bû, stranbêj bû û di vî warî de gelek xebatên wî hebûn. Abdullah Kizildag jî yek ji welatparêzan bû.

10 sal berê jî êrîş çêbûbû

Di 10’ê rêbendana 2013’yan de 3 jinên kurd Sakine Cansiz, Fidan Dogan û Leyla Soylemez li Buroya Enformasyonê ya Kurdistanê ya li Parîsê hatibûn kuştin.