NAVENDA NÛÇEYAN

Çalakvana kurd Hêro Wekîl Cafer di warê parastina jîngehê de xelata ‘Lehengên Jin ên Mafên Jîngehê yên 2023’yan’ ya navneteweyî girt. Navenda Mafên Mirovan a Cenevreyê vê xelatê dide jinên di vî warî de xebatê dikin.

Hêro Wekîl Cafer di rûpela xwe ya facebookê de ragihand ku di warê parastina jîngehê de li ser asta navneteweyî xelata ‘Lehengên Jin ên Mafên Jîngehê yên 2023’an’ ku ji aliyê Navenda Mafê Mirovan a Cenevreyê ve tê dayîn, wergirtiye.

Navenda Mafê Mirovan a Cenevreyê her sal roja 10’ê berfanbarê ku di heman demê de Roja Mafê Mirovan a Dinyayê xelatan belav dike. Bi vê yekê sazî piştgirî dide jinên di vî warî de xebatê dikin. Çalakvan Hêro Wekîl Cafer jî di vê çarçoveyê de xelat girt.

Hêro Wekîl Cafer di sala 1986'an de li Helebçeyê hatiye dinê. Ev bi salan e li ser mafên mirovan dixebite. Di radyoya Dengê Nwe de xebitiye. Dîsa ji bo penaberên kurdên Rojava li Başûr kar kiriye. Li ser jinan, mafên war, mafên mirovan semîner dane, xebat kiriye.   

Xebata wê ya dawî li ser ji nû ve bikaranîna avê û ji bo elektrîkçêkirina ji rojê sazkirina xaniyeke model bû.