Diyarname
Niha romaneke din li ber destê xwendevanan e: “Delala Dînik”. Romana ku ji aliyê Salih Serhedî ve hatiye nivîsandin bi sernavê “Delala Dînik, Rastiyeke Geliyê Zîlan” hatiye pêşkêş kirin.
Di sedsala 20’î de li Geliyê Zîlan komkujiyeke mezin hate çêkirin. Herêm ji gel vala bû. Heta niha li ser komkujiya Geliyê Zîlan lêkolîn hatin kirin, pirtûk hatine nivîsandin, belgefîlm hatin kişandin. Niha yeka din li wan zêde bû, ew jî roman e. Salih Serhedî mesele bi romanê aniye rojevê.
Karaktera sereke yeka bi navê Delal e, delaleke bedew e ku ew di vê komkujiyê de hem malbata xwe, hem destgirtiyê xwe winda dike; ew bi xwe jî piştî çend şevan di bin cenazeyên birîndaran de çavên xwe vedike û ew komkujiya ku li ber çavên wê diqewime dibe sedema dînbûna wê. Li ser vê yekê nivîskar wisa gotiye, “Piştî ku li herêma Geliyê Zîlanê kevir li ser kevir namîne, Delal xwe diavêje deşt û çiyayan, tî û birçî bi rojan li derve dimîne. Demekê şûn de Delal li Erdîşê xwe diavêje mala Helîm Xoce. Helîm Xoce li wê xwedî derdikeve û wekî bavekî nêzîk dibe. Lê mixabin piştî çend salan Delal bi awayekî hovane, bi destê çend kesên qeşmer tê kuştin. Ev bûyera han, hê jî wekî çîrokeke dilsoj di nav gelê herêmê de tê gotin”
Niha bi ser Delalê re, hem çîroka wê, hem jî komkujiya Geliye Zîlan bi rêya wêjeyê careke din tê ber çavên xwendevanan.

- Delala Dînik / Salih Serhedî / Weşanên Nûbihar / Roman / 2024 / 128 rûpel