Qamişlo
Ji bo pîrozkirina Konseya Bilind a Kurdan ku di encama îtîfaqa her du Meclisên Kurdan yên rojavayê Kurdistanê de hate avakirin, li tevayî rojavayê Kurdistanê bi tevlîbûna sedhezaran xwepêşandan hatin duristkirin.

Ji Qamiloyê heta Efrînê, ji Kobanê heta Dêrîka Hemko, ji Amedê heta bajarê duyem yê herî mezin yê Sûriyeyê Helebê roja Yekşemê bi sed hezaran kurd daketin qadan.

Bi slogana “Şandeya Kurd a Bilind nûnerê min e” li her aliyê rojavayê Kurdistanê meş pêkhatin. Di xwepêşandanê de alên kurdan û wêneyên serokên kurdan hatin bilind kirin. Di nava van wêneyan de wêneyê Rêberê PKK'ê Abdullah Ocalan û ji rêberên kurd yên sedsala 20'emîn û damezirênerê PDK’ê Mela Mistefa Barzanî ku li rex hevbûn bal kişandin. Her wiha wêneyên Mesûd Barzanî, Celal Talabanî jî hatin bilind kirin.

Di meşên ku hate dîtin piraniya wan jin bûn, her wiha yekîne û komîteyên parastinê ewlehiya meşê girtin.

Bajarên Kobanî, Efrîn, Amûdê û Dêrîka Hemko ku di 19-20’ê Tîrmehê rêveberiya wan ket destê gel, gelê van herêman da ketin kolanan. Wekî din li bajarên Dirbesiyê û Serêkaniyê jî meşên bi coş hatin pêkanîn.

Şandeya Kurd a Bilind dê kurdan hem li hundir û hem jî di qada navnetewî de temsîl bike. Di Şandeya Bilind de, 5 ji MGRK û 5 jî ji ENKS’ê bi giştî 10 kes cih digirin.