Diyarname
Şaredariya Peyasê navê Arjen Arî li pirtûkxaneya cîwanan ya şaredariyê danî û di der barê Arjen Arî de jî panelek li dar xist.
Şaredariya Peyasê di civîna encumenan ya meha borî de biryar girt ku navê Arjen Arî li pirtûkxaneya ciwanan ya di bin banê Gerînendetiya Çand û Hunerê ya Şaredariyê de xebatan dimeşîne bike. Lê ji alî Qeymekamê navçeyê ve bi hinceta “Navê Arjen Arî di ferhenga me de nîn e” nehat qebûl kirin. 
Bernameya ji alî Gerînendetiya Çand û Hûnerê ya Şaredariyê ve hat li dar xistin, gelek xwendevanê pirtûkxaneya ciwanan û heskiriyên Arjen Arî beşdar bûn. Cîgirê hevşaredaran xêrhatin li mêvana kirin şûn de bername ji alî Serokê Pena Kurd Omer Fîdan ve hat bi rê ve birin. Fîdan li ser navenda ciwanan nêrînên xwe anî ziman û got, “Her çiqas ji alî qeymekamê navçeyê navê Arjen Arî hatibe qedexekirin jî, di civîna encumenan ya şaredariyê de, îro careke din biryar hat stendin ku bi awayeke fermî jî navê Arjen Arî ji bo li navendê bike, dê hewl bidin. Em bi biryar in ku vegerin mala xwe û cih û mekanên xwe bi navên kurdewarî bi nav bikin.”
Dûre Zînnet Dîncer der barê Arjen Arî de boçûn û nêrînên xwe anî ziman û got: “Ez pir kêfxweş im ku cihek û mekanek wiha diyarî navê Arjen Arî hatiye kirin. Di heman demê de hewldanên qayûman jî şermezar dikim.” Pişt re li ser profîla kesayetiya Arjen Arî nêrînên xwe got şûn de helbesta wî ya bi navê “Heskirina Hêzê” ji bo xwendevanan xwend.
Xwişka Arjen Arî Necla Arî jî kesayetiya Arjen di nav malbatê de bi çi awayî bû ku bi zimanê kurdî tim li pêş bû û bi vî zimanê xwe yê şêrîn çawa bi ser ket û berhemên wî bûne malê gel anî ziman.
Nivîs Mehmet Yilmaz jî di der barê hevaltiya xwe û ya Arjen Arî de axvî: “Kesayetiyeke Rojhilata Navîn heye. Hevaltiyeke qels û li ser berjewendiyên ferdî ye. Ew berjewendî biqete, hevaltî jî diqede. Lê hevaltiya min û Arjen Arî ji hev pir cihê bû. Me bi rihê hev zanibû û li gor wî rihî tevdigeriyan. Her tiştên me yek bû û me bi hev re parve dikir. Koçkirina wî birîneke kûr bi min re da ava kir…”
Nivîskar Îsmaîl Dundar jî diyar kir ku “bi xwendina berhemên wî re min wî baş nas kir û fahm kir ku hevalekî min ê ji dil û ne ji rêzê ye. Ez bawer dikim ku kesên berhemên wî bixwînin, dê li vê fikra min rast bên. Ya herî girîng, ku li ser navê Arjen pêşbirkek tê lidar xistin û ji aliyê weşanxaneyeke tirkan ve tê li dar xistin e. Çima ji aliyê kurdan ve nayê li darxistin?” Berî gotina xwe bi dawî bike, helbetek Arjen Arî ya bi navê “Kirîvê Kêvo” xwend û da diyar kirin ku Arjen rihekî gelemperî û erdnîgariya mirovahiyê hildigirt û li hember gelên din bi vê helbestê lêborîn li ser navê gelê xwe ji wan xwestiye.
Bername bi helbeta Arjen Arî ya “Efendîno” ku ji alî Omer Fîdan ve hat xwendin bi dawî bû.

***

Nûçeya Eleqedar:

- Navê Arjen Arî li pirtûkxaneyê kirin û li vir çalakiya pêşî li dar dikeve