Diyarname
Derhênerê macar Bela Tarr 70 sere bî û merd.

Derhêner Tarr serey 1955'inan de bajarê Pêcs ê Macaristanî de hamebî dinya. 6'ê aşme zî Budapeştey Macaristanî de merd.

Dadê ê 50 serî zêdeyêrî tiyatroyan de zey suflor kar kerd. Wexto ew 10 sere fîlmê "Merdişê Îvan Îlyîç" ê Tolstoy qeybî televîzyonî hameyne antişî. Dadê ê ew berd sed û ê di fîlm de, rolêke qickek de kay kerd. Bi eno awa ew kewt miyanê sinema.
Dimara ciwanî xwu de dest bi antişê fîlm û belgefîlman kerd. 16 sere bî bi amatorî belgefîlmê serê jiyaney karkeranê Macaristanî de ant. Ê, fîlmo xwu "Családi tűzfészek" serey 1977'inan de wexto 22 sere bî ant. Eno fîlmê ê wo yewîn ê metrajderg bî.

Seranê 2000'î de dinya de namey ê bî vila. Ew bi fîlmanê xwu ê siya û spê antê hamebî naskerdişî. “Karhozat”, “Bergîrê Torino”, “Merdimo Londra de”, “Armonî Tarî”,"Tangoyê Şeytanî" henî fîlmê ê ye ke hameyê naskerdişî. 

Ê bi fîlmê xwe "Tangoyê Şeytanî" Festîvala Fîlman a Berlînî Berlînale de xelat girot bî. Fîlm tam 438 deqe yo. Ê Stenbol de zî Festîvala Fîlman ay Stenbolî ra Xelata Rûmete ay Sînema girot bî. Ê Festîvala Kahire, Festîvala Tokyo de "Xelata Serkewtişê Heme Jiyane de" girot bî. Serey 2023 de jî Xelatanê Fîlman ê Ewropa de Xelatey Rûmete dabî ê.