WAN

Komeleya Çand û Zimanê Kurdî ya Arsîsa li Erdîşa Wane xebatên xwe yên li ser çand û ziman didomîne. Niha Miduriyeta Perwerdehiya Neteweyî ya Wanê bi hinceta “Perwerdehî bêdestûr hatiye dayîn” 400 hezar û 50 TL cezayê pereyan li komeleyê birî. Ceza roja 25'ê adara 2026'an hate birîn.

Li ser vê yekê îro rêveber û endamên komeleyê daxuyanî dan çapemeniyê.

Daxuyanî ji aliyê Hevserokê Arsîsayê Cevdet Zîlanli ve hate xwendin û wiha hat gotin:
- Zimanê Kurdî xeta me ya sor e. Gelê kurd bi ziman, wêje û nirxên xwe yên qedîm beşdarî mîrateya mirovahiyê bûye. Ji Baba Tahirê Uryan heta Ehmedê Xanî, ji Feqiyê Teyran heta Cigerxwîn, ev ziman bîr û nasnameya me ye.
- Ev biryar wekî “hewldana astengkirina perwerdeyê” ye. Arsîsa û Komeleya Mezopotamyayê ya Tekîrdaxê ne saziyên bazirganî ne. Em li ser bingeha dildariyê ziman û çandê diparêzin. Ev ceza ne tenê li saziyekê, lê di heman demê de li mafê perwerdehiya zimanê zikmakî yê zarok û ciwanan hatiye birîn.
- Divê tavilê zordariya li ser ziman û çanda kurdî bi dawî bibe, hemû astengiyên li pêşiya xebatên çandî werin rakirin û cezayên îdarî yên li ser saziyan werin betalkirin. 
- Tu ceza nikarin pêşî li xebatên me yên li ser ziman û çandê bigirin. Dengê ku îro li vir bilind dibe, dengê kolektîf ê gelê kurd e. Zimanê me hebûna me ye û xeta me ya sor e.