Diyarname
Du hefte berê ji ber ku pere peyda nekirin derneketin maça Maltepesporê û ji ber vê yekê sê pûanên wê hatibûn jêbirin. Diyarbakir Spor vê hefteyê (28'ê mehê) dê bi Çorum Belediyesporê re bilîze. Tîma Diyarbakir Sporê ger dernekeve vê maçê jî dê ji lîgê bêavêtin.
Li gor rêgeza fûtbola Tirkiyeyê tîmek di salekê de dernekeve du maçan ji lîga ku têde ye tê avêtin ber bi lîgeke jêrtir ve. Diyarbakir Spor jî niha bi talûkeya vê rewşê re rû bi rû ye ji ber ku pereyên wan nîn in herin deplasmanê û bilîzin.
Niha 23 mîlyon TL deynên Diyarbakirsporê hene û kes xwedî lê dernakeve. Tîm derneveke maçeke din jî dê ji lîgê bê avêtin û bikeve lîga amator.
Li Tirkiyeyê lîga herî mezin "Spor Toto Super Lîg" e, piştî wê "PTT 1. Lîg Tê". Dûre "Spor Toto 2. Lîg" tê ku di vê lîgê de du kom hene "Koma Spî", "Koma Sor". Û dûre "Spor Toto 3. Lig" tê. Di vê lîgê de jî "Koma 1'em", "Koma 2'yem" û "Koma 3'yem" tê. Diyarbakir Spor niha di lîga herî dawî "Spor Toto Lîga Sêyem, Koma Sêyem" de ye û ger ji lîgê bê avêtin dê bikeve "Lîga Amator".
Niha Diyarbakir Spor di komê de di rêza herî dawî de ye, tu pûanên wê nîn in, bi ser de 3 pûan deyndar e.

Ji tîmên Amedê, tîma Şaredariya Bajarê Mezin a Amedê "Diyarbakir Buyukşehir Belediye Spor" (Diyarbakir BB) di Lîga Sêyem Koma Yekem de dilîze. Di serdema 2012-2013'yan de heta niha di vê komê de 8 maç hatine lîstin û Diyarbakir BB di hemû maçan de bi ser ketiye û bi 24 pûanan di rêza yekemîn a komê de ye. Piştî Diyarbakir BB'yê Orhangazîspor bi 17 pûanan di rêza duyemîn de ye. Yek ji tîma kurdan Belediye Vanspor jî di vê komê de ye û di rêza 6'an de ye, 13 pûanên wê hene. Vê hefteyê (28'ê mehê, saet 13.30) dê Diyarbakir BB û Belediye Vanspor li Amedê bi hev re bilîzin.