Diyarname

9 salên me temam bûn. Di vê salvegera Diyarnameyê de hin not...

Di 21.04.2005'an de me dest bi weşana xwe kir. Ji wê rojê heta îro heta ji me hat me kir ku em xizmetê ji bo yên dikarin kurdî bixwînin bikin.

Em kir ku em bibin pencereyeke ji bo xwendevanên me tiştinên nû, balkêş û girîng jê bibînin.

Me kir em bibin dengê we, dengê xwe, dengê zimanê kurdî.

Di van 9 salan de bi zimanê xwe me kir ku em xeta rojnamegeriya kurdî ku Mîqdad Mîdhed Bedirxan sala 1898'an de dabû dest pê kirin bidomînin.

Di van 9 salan de miheqeq kêmasiyên me çêbûne, lê heta ji me hat me kir ku tiştinên xweş û baş bikin. Ger hebe kêmasiyek me di vê salvegerê de em lêborîna xwe dixwazin. Ger hebe kêmasiyeke me em li benda pişniyar û hişyariya we ne.

Em hêvî dikin hê gelek salên din emê bi hev re bin û emê bikaribin bi zimanê rojnamegerî xebata xwe, xizmeta xwe bidomînin.

***

Û hin notên din:

- Em careke din bi bîra weşanger û nivîskarên kurd dixin: Berhemên we negihîjin ber destên me em nûçeyê li ser çênakin bila kes nexeyide.

Ev yek ji bo produktorên kurd jî derbas dibe ku albumên kurdî derdixin.

- Di warê nûçeyan de carinan agahiya me ji tiştan çênabe, hûn me agahdar bikin heta ji me bê emê nûçeyên we bişopînin û li ser tiştinan binivîsin.

- Heta niha gelek kes hene ku yekem nivîsa wan di Diyarnameyê de derketiye û paşê pêre pêre nivîsên wan li cihên din hatine weşandin û niha wekî nivîskar li piyaseyê ne. Em kêfxweş in ku me xizmeteke wisa ji bo wan kiriye. Ji bilî van çend hevalên me hebûn ku carinan bi wergera xwe ked didan Diyarnameyê. Em careke din bibîra wan dixin ku werger kareke muhîm e û Diyarname jî li benda xebata we ye.

- Bi taybetî em ji hevalên xwe yên bi zimanên biyanî dizanin dixwazin tiştên li ser kurdan di çapemeniya biyanî de hebe ji bo me wergerînin û bişînin.

- Gotineke ji bo kirmanckî (zazakî)... Heta niha di vî warî de gelek kêmasiyên me çêbûn, emê bikin ku vê kêmasiya xwe hinek sererast bikin. Hevalê me Mahmûd Nêşite di vî warî de quncikê xwe dinivîse. Hin hevalên din jî me ji wan re gotiye, kesên din hebin ku di vî warî de binivîsin em amade ne bi hev re li ser biaxivin.

- Ji roja me rûyê Diyarnameyê guhart beşa ÎRO ÇI QEWIMÎ? jî me lê zêde kir. Di vê beşê de her roj agahiyên dîrokî yên li ser kurdan û li ser dinyayê cih digirin. Çawa ku em qala bûyîn û mirina nivîskarên biyanî, navdarên biyanî dikin, em dixwazin yên kurd jî têde cih bigirin. Mînak rojbûna nivîskarên kurd ên dijîn. Heta niha me hin lê bar kirin, lê hin nivîskarên kurd em nizanin çi rojî hatine dinê. Mimkûn e ew bi xwe jî nizanibin, lê nivîskar/rojnameger/derhêner/muzîkarên (her cure hunermend) ku bi rojbûna xwe bizanibin hebin (bi taybetî em qala yên berhemên wan hebin) ji bo me bişînin emê li gor wê rojê di vê beşê de bi cih bikin.

Û tiştên hatin bîra we, tiştên hûn bipirsin hebin, em li vir in...

***

Diyarname malpereke serbixwe ye û li ser rêgezên rojnamegeriyê xebata xwe didomîne.. Diyarname ne girêdayî tu partî, rêxistin an derdorî ye. Heta îro ji bo Diyarnameyê me qiruşek jî ji kes, partî, rêxistinê negirtiye. Dil ew e kurd hînê reklaman bibin û bi reklamê xwe piştgirî bidin me. Hebe emê kêfxweş bibin. Lê nebe jî ne xem e, Diyarname dê bidome.

***

Di vê salvegera Diyarnameyê de gorbihuşt Arjen Arî jî têde gelek kesî wekî qunciknivîskar ji bo Diyarnameyê nivîsî, hin heval hê jî vê xebata xwe didomînin. Em sipasiya wan hemûyan dikin.

Her wiha sipasiyeke jî ji bo endamên Lijneya Şêwirmendiyê ya Diyarnameyê Dawûd Rêbiwar, Helîm Yûsiv, Cîhan Roj û Zekî Ozmen; helbet sipasiyeke jî ji bo web designê Mehmet Dîmen.

***

Heta niha me bi 10 hezaran nûçe, nivîs û wêne weşandin. Em her roj nûçe, nivîs û fotoyên nû pêşkêşî we  dikin. Em hêvî dikin emê bikaribin hê bi dehan hezarên din nûçe, nivîs û fotoyan pêşkêşî we bikin...

*** 

Ji bo têkilî hûn dikarin mail bişînin ser vê navnîşanê: diyarname@diyarname.com Yan jî bi edîtor an endamên Lijneya Weşanê re bikevin têkiliyên.