Diyarname

Di Lîga Super a Tirkiyeyê de 3 hefte ji bo bidawîbûna lîgê maye, Fenerbahçeyê îro piştî maça bi Çaykur Rizesporê re şampiyoniya xwe ragihand.

Maç li stada Fenerbahçe li Şukru Saraçoglu li dar ket. Maç bi 0-0 bi dawî bû. Bi vê encamê Fenerbahçeyê pûanên xwe derxist 68'an û şampiyoniya xwe ragihand. Niha di rêza duyem de Galatasaray bi 56, di rêza sêyem de Beşîktaş bi 55 pûanan e. 3 hefte mane, di van sê hefteyan de Fenerbahçe her têk here jî fêde nade, loma Fenerbahçe bi awayê matematîkî bû şampiyon.

Bi vê yekê Fenerbahçeyê 19'emîn şampiyoniya xwe ragihand. Li Tirkiyeyê heta niha tenê Galatabaray 19 caran bûbû şampiyon. Yê Beşîktaşê 13, yê Trabzonê 6 û yê Bursasporê jî şampiyoniyeke wê heye. Ji bilî van tîman tu tîmek din di Lîga Super de nebûye şampiyon.

Fenerbahçe di 3 hefteyên mayî de dê bi Akhisar BLD.(Deplasman), Karabukspor û Kayserispor (Deplasman) re bilîze.

Heta niha ji nav teknîk dîrektorên tirk Mustafa Denizli û Aykun Kocaman Fenerbahçe gihandibûn şampiyoniyê, Ersul Yanal bû sêyemîn teknîk dîrektorê tirk ku Fenerbahçeyê dike şampiyon. Her wiha ev yekemîn şampiyoniya Ersul Yanal e.

Di nav 24 lîstikvanên niha yên Fenerbahçeyê de 15 jê yekem car heyecana şampiyoniyê bi dest dixin. Emmanuel Emenike, Bruno Alves, Michal Kadlec,  Samuel Holmen, Alper Potuk, Dirk Kuyt, Egemen Korkmaz, Hasan Ali  Kaldirim, Mehmet Topal, Moussa Sow, Pierre Webo, Raul Meireles, Salih Uçan,  Serdar Kesimal û Erten Ersu gihîştin şampiyoniya yekemîn. 

Serokê Klûba Fenerbahçeyê Aziz Yildirim ev 17 sal in serok e û di vî warî de rekora serokê berê Şukru Saraçoglu şikand. Lîstikvanan piştî maçê ragihandin ku ew vê şampiyoniyê diyarî Yildirim dikin.