DÊRIK

Bi armanca parastina herêma kurdan û hevkariya di navbera hêzên YPG’ê û Pêşmergeyan de, Fermandarên YPG’ê û gelek Subayên hêzên Pêşmerge li bajaroka Til Koçer ya girêdayî bajarê Dêrikê ya Rojavayê Kurdistanê li hev civiyan.

Piştî geşedan û rewşa dawî ya Iraqê û paşvekişîna Artêşa Iraqê ji gelek xalên sînor û dagirkirina çeteyên DAIŞ’ê ji gelek bajarê Iraqê, her wiha di nav de bajarên li ser sînorê bi Rojava û Başûrê Kurdistanê re, hêzên leşkerî yên kurdan ên Rojava û Başûrê Kurdistanê ketin nava liv û tevgerê. Her wiha bi taybetî ji bo parastina sînorê Sunnuniye ku 13 km nêzî bajaroka Cezaa yê girêdayî bajarê Tirbespiyê yê Rojavayê Kurdistanê ye, herêma Şengalê, bajaroka Til Koçer û bajarê Rebîa yê girêdayî Iraqê, Fermandarên YPG’ê û gelek Subayên hêzên Pêşmerge civînek pêk anîn. Civîn li bajaroka Til Koçer pêk hat.

Li gorî çavkaniyekî şopdar ji bo ANHA’yê diyar kirin ku di civînê de ji aliyê YPG’ê ve Fermandar YPG’ê Cemşîd Osman amade bû. Her wiha ji aliyê Pêşmergeyan ve jî gelek Subayên hêzên Pêşmerge yên Başûrê Kurdistanê amade bûn.

Heman çavkanî diyar kir ku di civînê de her du aliyan mijara hevkariya di navbera her du hêzan de, parastina welatiyên sivîl û parastina ewlekarî û aramiya herêmê ku di vê dawiyê de ji aliyê DAIŞ’ê ve tevlî hev bûye, gotûbêj kirine. Her wiha da zanîn ku ev hevkarî dê bi awayekî sîstematîk bê domandin û di civînê de her du aliyan diyar kirin ku parastina welatiyan xeta sor e.

Di berdewama civînê de hate gotin ku ji ber herêma Şengalê nêzî bajarê Mûsilê ye û di bin tehdîda çeteyên DAIŞ’ê de ye, Fermandarên YPG’ê diyar kirin ku ji bo parastina Şengalê çi ji wan bê xwestin ew amade ne.

Di civînê de hate gotin ku ji ber ku çeteyên DAIŞ’ê nêzî bajarên wekî Til Koçer û Cezaa ne ku ji aliyê YPG’ê ve hatine rizgar kirin. Her wiha bajarê Rebîa ku Artêşa Iraqê jê vekişiya û hêzên Pêşmerge cihên xwe têde girtin. Ji ber vê yekê pêwîst e hêzên kurdî ji hemû êrîşên çeteyan haydar bin.

Hêjayî gotinê ye, Fermandariya Giştî ya Yekîneyên Parastina Gel (YPG) di 10’ê pûşperê de bi daxuyaniyekê amadekariya xwe ji bo şandina yekîneyên pispor û zaniyarên leşkerî ji bo alîkariya gelê Başûrê Kurdistanê û li gel wan herêmê ji êrîşên çeteyan biparêze, anî ziman.

Piştî ku Fermandariya YPG’ê daxuyanî da di roja din de yekîneyeke YPG’ê li gel hêzên Pêşmerge bersiva êrîşeke çeteyên DAIŞ’ê li nêzî gundê Selemiyê yê li aliyê Iraqê û yê li hemberî bajaroka Cezaa yê girêdayî bajarê Tirbespiyê dan.

Hin dezgehên çapemeniyê li ser zimanê hin kesan ku digotin berpirsiyarên Pêşmergeyan in, diyar kirine ku tu hevkarî di navbera Pêşmerge û YPG’ê de tune ne. Civîna îro vê yekê vala derdixe.

ANHA