Serbaz Siyamend

Li Hewlêrê ‘Festîvala Helbest Nefesa Jiyanê ye’ ku du rojan berdewam kir bi dawî bû. 5 kesên di pêşbaziya festîvalê de bi ser ketin xelatên xwe wergirtin. Berpirsê Ragihandinê yê Komeleya Qîmetdayîna Qelîteya Ciwanan Kak Hîwa diyar kir ku piştî vê festîvalê amadekariya ji bo du festîvalên din li bajarê Silêmanî û Koyê jî li dar bikevin amadehiyan dest pê kirin.

Festîvala "Helbest Nefesa Jiyanê ye" ji aliyê Komeleya Qîmetdayîna Qelîteya Ciwanan ve hate organîzekirin. Festîval li Qada Çarçira ya Hewlêrê du rojan berdewam kir. Cîgirê Wezîrê Rewşenbîriyê Methî Mendalawî, Wezîrê Karê Civakî Corc Mensur, Endamên Parlamentoya Herêma Kurdistanê Arêz Abdula, Viyan Silêman, hunermend Şîrîn Perwer, rewşenbîr Ferhad Pîrbal û gelek kesên din beşdarî mîhrîcanê bûn.

Di roja yekemîn a festîvalê de ji bilî pêşkêşkirina gotara komeleyê, gelek ciwanan berhemên xwe yên helbestan pêşkêşî lijneya festîvalê ku ji helbestvanên wekî Xerîb Piştderî, Muhsîn Aware, Jiyan Babagurgur pêk dihat, kirin. Di roja duyemîn de lijneya festîvalê berhemên hatine, nirxandin.

Di encama nirxandina lijneyê de helbesta Raber Farîq wekî yekemîn hate hilbijartin. Her wiha Twana Adnan Berzincî bû duyemîn, Meshud Şêxwesanî bû sêyemîn, Abdul Qeharî Mela Mehmûd bû çaremîn û Şiwan Berzincî jî bû pêncemîn. Bi merasîmekê xelatên her pênc kesan hate dayîn.

Li Koy û Silêmaniyê jî bê lidarxistin

Berpirsyarê Ragihandinê yê Komeleyê Kak Hîwa, diyar kir ku cara yekem e ku festîvala helbestan li bajarê Hewlêrê tê lidarxistin û wiha got: “Armanca festîvalê ew e ku em moralê bidin kesên ku bi helbestan re mijûl dibin û wan teşwîqî karê helbestan bikin. Her wiha di nava festîvalê de komên helbestvanên ciwan jî hate avakirin. Berpirsiyarê vê komê Qahar Şêxanî ye. Komele piştgiriyê dide vê komê. Gelek ciwan tevlî festîvalê bûn û bi awayekî adilane xelat hatin belavkirin. Di demeke kin de em ê festîvaleke din bi navê ‘Festîvala Wênesazan’ li Koyê li dar bixin. Ev festîval dê hefteyek bidome. Niha em li Silêmaniyê amadehiya ji bo festîvala sêyem a bi navê ‘Koma şahiyan’, dikin.”
 
(Nûçeya DÎHA'yê ji Azadiya Welat hatiye girtin)