DiyarName.Com

Finlanda wê piştgiriya Rojava bike

Hevseroka Meclîsa Gel a Rojavayê Kurdistanê Sînem Mihemed bi Wezîrê Geşekirin û Pêşxistina Nanetewî yê Finlandayê Pekka

Dîrok: 06/07/2014

HELSINKI
Hevseroka Meclîsa Gel a Rojavayê Kurdistanê Sînem Mihemed bi Wezîrê Geşekirin û Pêşxistina Nanetewî yê Finlandayê Pekka Havest re hevdîtin kir. Havest got ku ew ê alîkariya gelê Rojava bikin.

Hevseroka Meclîsa Gel a Rojavayê Kurdistanê Sînem Mihemed ji bo nirxandina rewşa aborî, mirovî û jiyanî ya Rojavayê Kurdistanê, li paytexta Finlandayê Helsinki bi Wezîrê Geşekirin û Pêşxistina Nanetewî yê Finlandayê Pekka Havest re hevdîtinek pêk anî. Herdu aliyan derbarê rewşa herêmên Rojava de ji aliyê rewşa mirovî û aborî nîqaş kirin û girîngiya avakirina projeyên xizmetguzariyê li Rojava anîn ziman.

Pekka Havest bal kişand ser rewşa welatiyên rojavayê, êş û astengiyên wan ên jiyanî wekî qutbûna ceyran û avê, ambargoya li ser herêmê û êrîşên ji aliyê çeteyên ve li dijî herêmê pêk tên û pêwîstiya piştgiriya saziyên Rêveberiya Xweseriya Demokratîk di van rewşan de destnîşan kir.

Ji aliyê xwe ve Şêwirmenda Dîplomatîk û Siyasî ya Wezareta Karê Derve a Finlandayê Katia Kalamaki diyar kir ku ew rewşa jiyanî ya li Rojava dizanin û got ji bo dayîna alîkariyê wê hemû hewldanên xwe bike. Kalamaki bal kişand ser siyaste Meclîsa Gel a Rojavayê Kurdistanê û wiha anî ziman: "Em li hemberî xeta sêyemîn bi rêz in. Em bi siyaseta demokratîk û çareseriya siyasî ji bo aloziya Sûriyeyê re ne."

Sînem Mihemed bi Rêveberên şirketeke pêkanîna projeyên wekî alîkariyên mirovî û peydakirina ceyranê bi riya enejiya rojê Peter Korea û Carlo re hevdîtin kir. Sînem Mihemed diyar kir ku pêdiviya Rojavayê Kurdistanê bi van projeyan heye.

Li aliyê din Sînem Mihemed bi rêveberê giştî yê Yekîtiya Rêxistinên Mirovî li Finlandayê re civiya. Ev yekîtî ji 20 rêxistinên navnetewî yên mezin e û di warê pêşkêşkirina xizmetan de kar û xebatan dike.

Her wiha Sînem Mihemed bi berpirsyara rêxistinên alîkariya mirovî ya Dêra Finlandî re hat cem hev da ku piştgiriya projeyên taybet bi jinan ên wekî kargehên terzîvanî û karên destan, bikin.
ANHA