Yê her kesî rojevek wî/ê heye. Her kes bi dû tiştek diçe, yê min pirsek serê min diêşand, niha pirsek din lê zêde bû. Ev pirs û bersiva van pirsan nîşan dide ku çiqas dîroka me tevlihev e, bi gotinek din hê çiqas pêdivî bi zelalkirina bûyeran heye.
Pêşî em ji pirsa yekemîn dest pê bikin:
Kîjan wêne yê Mîqdad Mîthed Bedirxan e?
Roja Rojnamegeriya Kurdî bû, 22'yê avrêla 2016'an. Wekî her rojnamegerên kurd min jî li ser vê rojê notek weşand di Faceebokê de: "22.04.1898...
Ji wê rojê ve ev kalê min e..." Pêre jî fotoyek Mîqdad Mîthed Bedirxan ku bawerî ew e fotoyê wî ye...
Birêz Îbrahîm Seydo Aydogan nîşe nivîsî ku li ser vî wêneyî nîqaşek cidî heye û diyar kir ku ez dikarim ji Sînemxan Bedirxan yan ji Mehmûd Lewendî bipirsim.
Min cih de peyamek ji bo birêz Lewendî şand, pirsa wêneyê kir, wî jî got ew li derve ye, here mal dê ji bo min fotoyê bişîne.
Piştî rojek Lewendî vîdyoyek ku têde hevpeyvîna ligel Sînem Bedirxan kiriye (sal 2010, Kurd1 TV) di faceya xwe de weşand. Di hevpeyvînê de pirsa wêneyê Mîqdad Mîthed Bedirxan kir. Di wir de Sînemxan dibêje ew fotoyê heta niha wekî yê Mîqdad Bedirxan tê zanîn ne ê wî, yê Osman Bedirxan e û fotoyê Mîqdad Mîthad Bedirxan ev e (nîşan dide)...
Sînemxan dibêje Mamê min Kamûran Bedirxan ji min re gotiye di vê wêneyî de kî hene...
Yek jê ew e ku mirov hîmdarê çapemeniya xwe baş nas neke. Ev yek eybek mezin e ji bo min jî, ji bo hevalên min ên heta îro ev wêne bikar anine jî. Heta îdîayek din derkeve holê, heta sedî sed rastiyek din derkeve holê tiştê rast niha gotinên Sînemxan Bedirxan in û wêneyê Mîqdad Mîthed Bedirxan ev e...
Simko kengê hat kuştin?
Pirsa din, serhildêrê kurd Simko Axayê Şikakî kengê hatiye kuştin? Roja 21'ê vê mehê yek ji hevalên me yên rojnameger Gulê Algunerhan peyama bîranîna Simko weşand di twittera xwe de.
Di Diyarnameyê de beşa "Îro çi qewimî?" heye ku di serî de li ser dîroka kurdan, li ser dîroka dinyayê agahî hene, me lê kirine, bi awayekî jixwe ber her roj agahiyên wê rojê tên pêş. Li ser twittera Algunerhan min li ya Diyarnameyê nêrî agahiyek wisa nîn bû. Min şik bir ser, ka çima? Ez ketim mejiyê Diyarnameyê min dît ku wekî kuştina Simko ne 21'ê mehê, 23'yê tîrmehê nivîsandiye. Min zêdetir meraq kir çima wisa?
Min got ez bigerim ka kî çawa gotiye. Di motora lêgerînê de dema ez geriyam, encamên ecêb derketin holê. Vane hin encamên li ser kuştina Simko:
- Gulê Algunerhan: 21.07.1930
- Wîkîpedîaya beşa tirkî gotiye: 26.07.1930 (Wîkîpedîaya îngilîzî tenê sal gotiye, 1930)
- Wîkîpedîaya kurdî gotiye: 30.06.1930
- Îbrahîm Halîl Baran: 26.07.1930
- Rûdawê nûçe çêkiriye (roja 23.06.2015) û dibêje: 21.06.1930
-Jîr Dilovan (Pirtûka "Bi pirs û bersivan dîroka kurd û Kurdistanê, weşanên Pêrî): 30.06.1930
- Kakşar Oramar di Azadiya Welat de dibêje "Di 27'ê tîrmeha 1930'î de Simko digihîje nava...." piştî çend paragrafan dibêje "roja 21'ê tîrmehê hatiye kuştin" (îhtîmal e, ew bi şaşî 27 hatibe nivîsin)
- Nivîsa Kakşar Oramar ku Cahît Merwan di bloga xwe de weşandiye (dîrok 28.06.2012. Ez nizanim ji ku girtiye, ji ber ku çavkanî nîn e) de Oraman wekî dîroka kuştina Simko wisa nivîsiye: 21.06.1930 (Di nivîsek din de jî Oraman heman tişt nivîsiye)
- Ayşe Hur di nivîsek de gotiye: 1929'an de Simko hatiye kuştin (Ji ku girtiye ev dîrok ez nizanim)
Welhasil. Mesele dirêj bû. 5-6 awayên cuda. Herî zêde Kakşar Oramar li ser Simko nivîsîbû, min peyam jêre şand û jê pirsî, wî wekî gotina xwe ya dawî got: "21.07.1930"...
Ev du mînak çend tiştan nîşanî me didin:
- Em kurd hê jî baş bi dîroka xwe nizanin. Gelek agahiyên me tevlihev in.
- Pêdivî bi saziyek kurdewar a li ser dîrokê dixebite û tiştên ku ew dibêje "Rast e" heye. Wê çaxê dê karê me hemûyan hêsantir be.
- Karê me rojnaemgerên kurd ji her kesî zehmetir e; em nizanin bi kî bawer bikin, bi kî nekin.
Vîdyoya hevpeyvîna Mehmûd Lewendî ligel Sînem Bedirxan:
Di encamê de derdikeve holê ku Mîqdad Mîdhed Bedirxan ev e. Tiştek muhîm e ku ji niha û pêde ev wêne bê bikaranîn.
.jpg)
.jpg)
