.jpg)
Pirî caran pirsgirêkên ziman û edebiyatê têne gengêşîn. Bi herhal wext hatiye ku em bêhtir bala xwe bidin avadaniya fikrî ya edebiyata xwe; çi edebiyata devkî be çi jî ya nivîskî.
Ev çend car in ez derî li malpera bi navê “felsefevan” vedikim. Tam û bêhneke xweşik xwe dide der; hûn bi kêfxweşî bi zimanê xwe nivîsên felsefîk ên di gelek waran de dixwînin.
Heman dilxweşî xwe di xwendina nivîsên Beyhanî Şahîn de jî dide der; ew bi tevî peyvan we bi meş û rêwîtî dike. Xebat û nivîsên wanî wê hukim, rê û rêçikên zanistî bi cih bikin. Xebatên wisa dibin sedem ku însan bi temkîn bin, bi berfirehî bifikirin, bi dû lêkolînan bikevin. Dîsa berhem û nivîsên wisa rê didin pirsan.
Wekî xwendevan hûn çi qas berhem û xebatên hêja dixwînin ew qas moral bi we dikeve. Em dikarin bibêjin êdî ji bo her xwendevanî derfet û berhem hene; kî bi çi warî re mijûl bibe dikare di wî warî de bixwîne, nivîsan lê bike an jî lêkolînan bike, hîç nebe em dikarin ji bo warên ziman, edebiyat, felsefe, dîrok û hin warên din behsa xweşbîniyê bikin.
Ji derî van xweşbîniyan em êdî bi dilxweşî dikarin navê hin malperan bidin ku bi qasî kovaran karê xwe cidî digirin, dibin sedemê pêşveçûnan.
.jpg)
