Gelo kurd ew qas ehmeq in? Tevgera kurdan jî ew qas ehmeq e?
Rojnameyek bi navê Yeni Şafak heye. Di rojnameyê de jî du kesên qaşo "parêzvanên pêvajoya çareseriyê"ne hene. Yek ji wan nivîskar û nûnerê Yeni Şafakê yê Enqereyê Abdulkadir Selvî ye û yê din jî nivîskarê heman rojnameyê Markar Esayan e.
Sevlî roja 17'ê vê mehê bi navê "Derbeya Qendîlê ya li hemberî Ocalan"* nivîsiye.
Di nivîsê de Selvî wisa dinivîse: "4'ê reşeyima 2015'an de Ocalan metnek teslîmê heyeta HDP'ê ku çûbû serdana wî, kir. Di wê metnê de wisa dinivîse: 'Çekan dema xwe temam kiriye. Tevgera kurd dê bi siyasetê rêya xwe bidomîne. Ez ê jî di Newrozê de bang li PKK'ê bikim ku ji bo dest ji têkoşîna çekdarî berde kongreyek li dar bixe."
Esayan** jî 19'ê vê mehê heman gotinan di quncikê xwe de dubare dike.
Her du jî HDP'ê sûcdar dikin ku peyamên Ocalan vedişêrin, lê peyamên Qendîlê diweşînin.
Dema mirov ji dûr ve dinêre, ev gotin rast dixuyin, lê gelo mesele wisa ye?
Di bersivek ji bo pirseke wisa de Hevserokê HDP'ê Selahattin Demîrtaş qala 10 xalan dike. Wê çaxê di serî de kurd, mafê her kesî heye ku ji Selvî jî, ji Esayan jî, ji hikumetê jî bipirse ka ev 10 xal? Ger xalek wekî Selvî û Esayan aniye ziman be, 9 xalên din çi ne?
Her du nivîskarên heta dawî hikumetê diparêzin çima qala van 9 xalên din nakin?
Ger hikumet an Selvî, an jî Esayan ji peyama Ocalan razîne û HDP sûcdar dikin ku çima peyamê belav nakî, wê çaxê bila ew belav bikin. Ma ew peyam ne di destê hikumetê de ye? Heta êvarê bi dehan TV ji bo hikumetê û alîgirên hikumetê di rêzê de ne, hema bila derkevin yekê û wê peyama Ocalan xal bi xal belav bikin. Ma HDP dibêje "Na belav nekin?" Berevajî vê, Demîrtaş got: "Dixwaze bila Hikumet belav bike."
Em kesên ji rêzê jî razî ne ku tiştên li Îmraliyê têne axivîn bêne belavkirin.
Meseleya bendavê
Selvî di heman nivîsa xwe de wisa dibêje: "Qendîl naxwaze HDP bendavê derbas bike. Naxwaze qada siyasî xurt bibe ku pêşî li qada çekdarî bigire."
Baş e, madem Qendîl naxwaze HDP bendavê derbas bike û loma nahêle HDP bi berendamên serbixwe bikeve meclisê, wê çaxê hûn çi dixwazin? Wê çaxê bendavê daxin sedî 3, sedî 5, sedî 7, Qendîl nexwaze jî hema bi rêyên heyî dê HDP bendavê derbas bike û siyaset xurtir bibe. Ka çima hûn nakin?
Ji nivîsên Selvî wisa dixuye ku Ocalan mirovek ew qas baş e, lê li Qendîlê wisa kesên xirab hene... Baş e, belkî jî rast dibêje birêz Selvî. Ger wisa be, hûn çima hê Ocalanî di hucreyê de digirin? Serbest berdin bila here yên li Qendîlê ji wir biqewirîne, yan jî bila guhê wan bikişîne û wan bîne ser rê... Dev ji berdanê jî berdin, hema cihek baş jêre vekin ku bila bikaribe rehetir tevbigere û gotinên xwe bîne cih. Na, hûn wê jî nakin. Ê, hûn wê jî nekin dê Qendîl jî bi ya xwe bike.
Birêz Markar Esayan di heman nivîsa xwe de vê pirsê jî dike: "Em pirsek gelek hêsan bikin: Çima? Kîjan sedema we ya mafdar heye ku hûn vê pêvajoyê bi dawî bikin?"
Em jî jêre bibêjin el însaf! Ma tu kor î, ker î, ka kengê HDP'ê gotiye bila pêvajo bi dawî bibe? Berevajî dawîlêanînê hemû mebûsên HDP'ê ji bo pêvajo baştir bimeşe di nav helwdanan de ne. Ji dêvla ku tu vê pirsê bikî, ji hikumetê bipirse ka te çi kir?
Selvî di nivîsa navborî de vê dibêje: "Di hevdîtinên li ser çareseriya pêvajoyê de gihîştibûn gavek baş. Di hin xalan de li hevkirin çêbûbû. Çi bû ev xalên lihevkirî:
1- Nexweşên girtî ku hejmara wan digihîşt 50'yî dê bihata berdan.
2- Girtiyên li Îmraliyê dê bihata guhartin.
3- Dê Lijneya Raçavkirinê bihata sazkirin."
Em êdî Selvî jî deynin aliyekî ku em êdî dizanin ew berdevkê hikumetê ye, niha em ji Esayan bipirsin: Ka ji van xalan kîjan hat cih? Tu çima van napirsî tu pirsa hêsan ji HDP'ê dikî? Ka pêşî pirsa xwe ya hêsan ji hikumetê bike.
Yan jî ji wê quncikê rojnameya hikumetê de bipirse ka çima hûn ev her sê xal neanîn cih? Yan jî bipirse hûnê kengê bînin cih?
Gotina dawî: Bi baweriya min kurd, tevgera kurd, HDP û hikumet û Ocalan jî bi ser de, her kes dizane kîjan reng spî, kîjan reş e. Wê çaxê çima wisa dibe? Bersivê vê pirsê bi qasî sed salek dirêj e. Em tenê vê bibêjin:
Îsal saleke germ e ji bo Tirkiyeyê û ji bo kurdan. Ya bi xêr.
* Ji bo nivîsê: http://www.yenisafak.com.tr/yazarlar/abdulkadirselvi/ocalana-kandil-darbesi-2007927
** Ji bo nivîsê:
http://www.yenisafak.com.tr/yazarlar/markaresayan/demirtas-bir-adams-degil-sanirim-olamayacak-da-2007969
.jpg)
.jpg)
