Diyarname
19’emîn Festîvala Cazê ya Stenbolê îsal di navbera 3-19’ê tîrmehê de bi bernameyeke têrtije li dar dikeve. Di festîvalê de nêzî 300 hunermendî dê hunera xwe pêşkêş bikin.

Ji bo eşkerekirina bernameya Festîvala Cazê ya Stenbolê li Salt Galatayê bi beşdariya Serokê Lijneya Rêveberiyê ya ÎKSV’ê Bulent Eczacibaşi, Midûrê Giştî yê Garantiyê Ergun Ozen û Dîrektora Festîvalê Pelin Opçin merasimek hat li dar xistin û bername hat eşkerekirin.
Îsal de festîvalê de 50 konser hene û li dor 300 hunermendên ji Tirkiye û derveyî Tirkiyeyê dê hunera xwe pêşkêşî hunerhezan bikin. Îsal Şanogeha Cemil Topuzlu ya harbiyeyê, Muzeya Arkeolojî ya Stenbolê, Îstanbul Modern, Salon, The Marmara Esma Sultan jî di nav de 20 cih wekî cihên konseran hatine eşkerekirin. Di nav van cihan de bexçeya Muzeya Sakip Sabanci, Amfiya Peravê ya Santralîstanbulê ya Zanîngeha Bîlgiyê jî heye.
Serokê ÎKSV’ê Eczacibaşi diyar kir ku ji çar aliyên dinyayê hunermend di festîvalê de cih digirin û got: “Nûnerên pêşeng ê muzîka rojevîbûnê li Stenbolê dibin mêvan. Festival mîsyona ji vê wêdetirî li xwe bar dike; ji welatên cuda û kevneşopiyên cuda hunermend bi hilberînên xwe yên xweser dike mêvan; di heman demê de kedê ji bo pêşketina cazkarên ciwan xerc dike.”

Ozen jî got ku ew wekî “Caz yeşili” (Keskahiya Cazê) dikin ku li Tirkiyeyê ji muzîka cazê bê hezkirin û ev muzîk berfireh bibe. Ji bo vê yekê ev 15 sal in piştgiray Festîvala Cazê dikin. Ozen wisa got: “Di nav cazê de cih ji bo ciwanan, ji bos taran heye. Em ji bo van cih vedikin. Em fikra cazê ya belavkirina li nav gel belav dikin.”

Dîrektora Festîvalê Pelin Opçin jî li ser bernameyê sekinî û qala hunermend û komên ku dê hunera xwe pêşkêş bikin kir. Her wiha Opçin diyar kir ku hin derên ku cihên ji bo konserê nayên bikaranîn jî wan ji bo konserdayînê xistine rewşeke bikarhêner.

Şahiya Tunelê

Di nav festîvalê de bi navê "Şahiya Tunelê" şahiyeke li dar dikeve ku îsal sala sisêyan e. Ev şahî ku bi serê xwe wekî festîvalê ye li aliyê Tunela (Tunel-Galata-Şişhane) Beyogluyê li cihek cihan konserên bi pere û bê pere têne li dar xistin. Ev şahî 7'ê tîrmehê saet 18.00'an de dê li dar bikeve, pêre jî li van deran dê konser, xebatên atolyeyê, peşangehên taybet û îkramên taybet li dar bikevin. Di nav hunermendên ku dê li Şahiya Tunelê derkevin ser dikê de Phronesis, Jo Stance, Julide Ozçelik, Gevende, Daniel Zamir û Eric Vloeimans hene. Dîsa New Cool Collective, Lefties Soul Connection, Jungle By Night, Ntjam Rosie jî ji bo 400'emîn pîrozbahiya têkiliyên dîplomatîk ên di navbera Tirkiye û Hollandayê de dê hunera xwe pêşkêş bikin.

The Istanbul Project

Yek ji çalakiya taybet jî "The Istanbul Project" e ku ji bo 40'emîn salvegera ÎKSV'ê tê li dar xistin.
Ev proje bi muzîkarê li dinyayê navdar Marcus Miller bi taybetî daye çêkirin.
Muller dê promiyera strana xwe “The Istanbul Project” yekem car 5'ê tînmehê li Harbiyeyê pêşkêş bike û di vê projeyê de ji Tirkiyeyê dê hunermend cih bigirin. Muller vê rêzeya xebata xwe di salên bê de jî dê bidomîne. Yek ji klarnetjenê navdar ê Tirkiyeyê Husnu Şenlendirici û yek ji hostayên amûrên lêdanê Burhan Ocal, dîsa rîtîmkarê navdar Okay Temiz, trompetjenê navdar İmed Demirer û vîrtuozê gîtarê Bilal Karaman dê di projeyê de tevî Muller kar bikin.
Ciwanên ku Muller ji ber jîrekiya wan bi taybetî piştgirî dide wan Loui Cato (bi daholê) û Aleks Han (bi saksagonê) dê di nav projeyê de bin.

Orkestraya Flarmoya Stenbolê

Antony Hegarty jî bi projeyeke taybet dibe mêvanê Stenbolê. Antony and the Johnsons ku di sala 2007'an de jî li Stenbolê konsereke pêşkêş kiribûn vê carê tevî Orkestraya Flarmonî ya Stenbolê ku ji 39 kesan pêk tê derdikeve Harbiyeyê. (9 tîrmeh, saet 21.00)
Antony and the Johnsons ku yekem car di sala 1998'an re nav da, di sala 2005'an de bi albuma "A am a bird now" xelata Mercurş girt.

"Hevdîtina digel hosteyan"

Hunermend Dhafer Yousse bi projeya "Dance of the inivisible dervishes" beşdarî di festîvalê de dike. Ew digel hunermendên xwe ji Tirkiyeyê Husnu Şenlendirici (bi klarnetê) û Aytaç Dogan (bi kanûnê) jî tevî komê dike û proieyeke taybet di bin navê "Hevdîtina digel hosteyan" de pêşkêş dike.

Konserên "Caza Ciwan"

Di çarçoveya festîvalê de ev 9 sal in muzîkarên ciwanên ên cazkar û komên cazê ên ji ciwanan qêk tê di çarçoveya rêzeya "Caza Ciwan" de derdikevin pêşberî cazhezan. Ji bo ciwanên di vê çarçoveyê de konserê bidin pêşî di 27'ê gulanê de di Konserên Nirxandina Ciwanan de hunera xwe pêşkêş dikin û yên bi ser bikevin li Şahiya Tunelê konseran didin. Di nav lijneya hilbijêr a vê beşê de Hulya Tunçag, Kerem Gorsev, Onder Focan, Pelin Opcin, Sevin Okyay, Elif Çaglar û Ferit Odman hene.

Di 9 salan de bi ser 100'î re cazkarên ciwan serî li vê pêşbaziyê dan û bi ser 30'î re kes û kom bi ser ketin; derfet dîtin ku di festîvalê de cih bigiri.

Xelata Serketina di Hemû Jiyanê de

Festîvala Cazê ya Stenbolê her sal Xelata Serketina di Hemû Jiyanê de jî dide. Îsal ji ber teknîka wî ya gîtarê û bi hostetiya xwe vê xelatê didin Neşet Ruacan. Ruacan yek ji muzîkarên hurmetgir ê Tirkiyeyê ye û ji bo pêşketina cazê jî gelek ked daye.
Neşet Ruacan di sala 1948'an de li Stenbolê hatiye dinê, di 10 saliya xwe de bi klasîk gîtar dest bi muzîkê kiriye. Paşê wî eleqeya xwe ay ji bo caz gîtarê kifş kiriye û ji bo dersên teoriya cazê bigire çûye Îngilistan û Amerîkayê. Ruancan ku di dibistanên navdar Leeds College of Music, Berklee College of Music û Brooklyn School of Music de ders girtiye, bi gelek hunermendên navdar ketiye studyoyê û ji bo wan gîtarîstî kiriye.
Hunermend Ruancan di sala 1985'an de beşdarî orkestraya Cazê ya Radyoya Stenbolê ya TRT'ê bû, ji sala 1996'an ve wî şeftiya vê orkestrayê kir û îsal ji wê derê malnişîn bû.
Neşet Ruancan di 3'yê tîrmehê êvara destpêkirina festîvalê de li The Marmara Esma Sultanê wê xelata xwe bigire.

Bilêtên festîvalê

Îsal roja 28'ê vê avrêlê dest bi firotina bilêtên festîvalê têne kirin. Yên bixwazin ji Biletîks, malpeta biletîks û ji navenda ÎKSV'ê (Nejat Eczacibaşi Binasi, Sadi Konuralp Cad. No: 5 Şişhane, Beyoglu, Stenbol) dikarin bilêtan bikirin. Îsal buhaya bilêtan di navbera 20 TL û 350 TL'yî de diguher.