Evdile Koçer

Bi kurt û kurmancî: ya min koçernameyek e...

Li ber peravê gotinên pepûk û brîndar ên ku êş û elemên xwe ji hev re vedibêjin kon vedidim û xwe davêjim ber bext û torê wan.

Gotinên fêris ên ku rengê qehremanên bênav vedihûnin, carna rehma xwe bi min tînin; wekî mêvanê Xwedê min li ser text û dîwanên xwe didin runiştandin; carna jî li ber devê deriyê xwe heta banga şefeqê disekinînin û awirên min ên bendewariyê ji xwe re dixin sinc...

Erê min got, a min koçernameyek e...

Gotin, wekî xalxalokên biharê li hewa dikevin û li ber ewrên fikrekê dibin hevok... Hevok hêdî hêdî pêlî nigê hev dikin û heta ku kaba wan biqerime dikevin ‘govend’ê... Xwêdana ku ji wan hevokan diçe, dilop bi dilop dikeve ser kaxiza nameyê...

Belê min got, a min koçernameyek e...

Nameyên min carna dibin çîrokên mirinê û ber bi jiyaneke nenas ve dibezin, carna dilopên trajediya civaka me di tevna xwe de dixin ken û tiqetiq û dibin mêvanên dildar û fêhmdaran, carna jî hin gotinên pizot datînin ser dawa xwe û ber bi tax û kolaneke tarî ve dimeşin...

Dema ku xwêdana hevokan dikeve ser nameyê, rihê min dilê min diperpite; ji ber ku name temam dibe û hêdî hêdî ji peravên min vediqete û pêl bi pêl digihîje ber peravên we...

Ez xulam min got, a min koçernameyek e...

Nameyên min, li ber peravê we dikevin destê hev û ji bo xatirê çavên we bi şev û roj ‘govend’ê digirin. Hin ji van nameyan, carna di dilê we de ji xwe re zozanên honik ava dikin, carna jî bi paş ve vedigerin û ji bo ku layiqî awirên çavên we bibin xwe ji nû ve diwedilînin.

Ez gorî min got, koçernameyek e...

Nameyên ku digihîjin ber ‘perav’ên we, heke bi dilê we be heke çirûskek dabe şev û rojên we hûn jî bi bi tilîliyan ve bi qewîtiyên nas û dostan ve bi xêr û silamet dişînin ber ‘perav’ên din. Ew jî ber bi ‘perav’ên dîtir ve dişînin...

Ez benî min got, a min koçernameyek e...

***

Têbiniya Diyarnameyê: Pirtûka hevalê me Evdile Koçer bi navê "Koçername" ji Weşanên Do derket. Koçer ji bo pirtûkê pêşekek nivîsiye. Digel pêşekek pirtûkek mirov dikare wekî nivîseke, ceribandineke ser bi xwe jî bi nav bike. Lewma me pêşega "Koçername"yê girt û em pêşkêşî we dikin. Ji bo bixwazin pirtûkê bi dest bixin jî dikarin bi weşanxaneyê re bikevin têkiliyê.

***

Nûçeya pêre têkildar:
- "Koçername" derket