Amed
ÎHD'ê rapora "Astengiyên li ber kurdî rakin" amade kir. Vane ji wê raporê hin xal:

Rapor li Şaxa ÎHD'ya (Komeleya Mafên Mirovan) a Amedê ji aliyê Serokê Şaxê Muharrem Erbey ve hat eşkere kirin.
Erbey bal kişand ser guherîna navên bi kurdî yên gund, bajar, herêm, kanî, çiya. Her wiha Erbey bal kişand ser azadiya ziman, got ku ger mirov bi zimanê ku hilbijartiye bi awayekî azad nikaribe bi wê dîtinên xwe bîne ziman mirov nikare qala azadiya wî zimanî bike.
Muharrem Erbey da zanîn ku ji sala 1923'yan ve qedexeyên bikaranîna kurdî dest pê kiriye, lê diyar kir ku di 19'ê kewçêra 1983'yan de bi hejmara 2932'yan zagoneke hatiye derxistin û bi vê yekê kurdî di jiyana taybet de jî hatiye qedexekirin. Erbey got ku her çiqas ev zagon di sala 1991'ê de hatibe betalkirin jî tirkî hê jî li gor Zagona Bingehîn tekane zimanê fermî ye û di perwerdehî, çapemenî, siyaset û gelek warên din de bikaranîna zimanên din hê rastî astengiyan tê.
ÎHD dê vê rapora xwe ji Serokomarê Tirkiyeyê Abdullah Gul û serokên çar partiyên li meclisê ne re bişîne.

Di raporê de hate xwestin ku hemû qedexên li ser ziman bêne betalkirin û ev daxwaz anîn ziman:

- Ji bo kurdî di warê cihên fermî de bê bikaranîn bila astengiyên fermî bêne rakirin.
- Li Zanîngehan beşên Kurdolojî bêne vekirin.
- Bila li televîzyonên herêmî û neteweyî serbest bê berdan.
- Bila li dibistanan perwerdehiya bi kurdî bê dayîn.
- Navên cihên bi kurdî ku hatine guhartin dîsa bi paş ve bêne îadekirin.
- Bila li girtîgehan astengî li ber axaftina bi kurdî ya girtiyên neyên danîn, pirtûk û nameyên bi kurdî neyên astengkirin.
- Bila qedexeya li ser navên bi kurdî ku kurd li zarokên xwe bikin bêne rakirin.
- Li balafirgeh, otofar, trên, mînîbus û otobusan bi kurdî anonst bê kirin, li van deran lewheyên ku hene bila bi kurdî bin.
- Li camî û mabedan bila mirov bi zimanê xwe yê zikmakî îbadetê bikin.
- Tabelayên kuçe, kolan, bulvaran bila bi kurdî û tirkî bêne nivîsandin.
- Xebatkarên li nexweşxaneyan dixebitin bila bikurdî bizanibin.
- Di reveberiyên herêmî de ji bo bi kurdî xizmet bê kirin bila hemû astengiyên li ser zimanan bêne rakirin.