Cemil Oguz

Li Qoserê jendirmeyan dest danîn ser 88 cure pirtûkan ku di nav de yên bi kurdî jî hene, tirkî jî. Van demên dawî ligel kurdan bixwe, berhemên wan jî rastî zordariyan tên. Pêşî li fûarê dest danîn ser pirtûkên Aramê. Dûre cih bi cih dengên zordariya li hemberî pirtûkan hat. Hewldana dawî duh li Qoserê çêbû: Jendirmeyan dest danîn ser 88 cureyên pirtûkan ên bi kurdî û tirkî.

Ekin Basim ve Yayincilik li Qoserê ye. Ew pirtûkan jî çap dike, lê piranî jî difroşe. Ew wekî Ekin Yayincilik li MovaParkê standê vedike û pirtûkên bi kurdî û tirkî difroşe. Ew ji hemû weşanxaneyan pirtûkên bi kurdî û tirkî digirin û di standa xwe de difroşin. Lê roja 27'ê mehê saet li dor 11'an Jendirmeyên herêmê hatin standê, lêgerîn pêk anîn û dest danîn ser 88 cure pirtûkan.

Berpirsê Ekin Yayincilik Emin Ay ji bo malpera me axivî û got ku van demên dawî bi ser twitterê re giliyên me dikin û wiha dom kir: "Çendek berê jî gilî kiribûn. Vê carê bi gotina 'pirtûkên gerîla difroşin, pirtûkên anarşîstan, yên komunîstan difroşin' gilî kirine. Jendirme hatin lêgerîn kirin, dest danîn ser pirtûkan. 88 cure pirtûk birin, di nav van de tenû 2 heb jê qedexe hebûn. Ew jî 10'ê vê mehê biryara qedexeyê ji bo van du pirtûkan derxistibûn. Yên din ne qedexe bûn jî birin, gotin 'emê li ser lêkolîn bikin, ger ne qedexe be emê paş ve bidin'. Pirtûk birin dozgeriyê."

Ligel pirtûkan Emin Ay jî dibin qereqola leşkeran a li Qoserê û pirsên wekî "hûn van pirtûkan ji ku digirin, kî tîne? Hûn çima difroşin?" û pirsên wisa... Ay jî di bersiva xwe de nîşan daye ku hemû pirtûk fermî ne, fatûreyên wan hene û her wiha hemû bi bandrol in û têde korsan jî nîn in.

Ligel her tiştî jî jendirmeyan dest datînin ser pirtûkan, bi gotinek din pirtûk bin çav kirin û birin. Emin Ay piştî îfadeyê berdan.
Li gor gotina Emin Ay parêzerê wan dê îro serî li dozgeriyê bide ji bo ku pirtûkan bi paş ve bigire. Ay ku li ser navê weşanxaneyê ku ev çend sal in pirtûkan difroşe wisa dibêje, "Dema pêvajoya çareserî hebû pirtûkên Ocalan jî hebûn li standê. Wê çaxê jî jendirme dihatin, lê mêze dikirin, qet tiştek nedigotin, carinan pirtûk dikirîn û diçûn jî. Niha her gilî tê kirin û jixwe dixwazin desteser bikin. Ev pirtûkên ku niha dest danîne ser, her çiqas qedexe li ser wan tune be jî, dibe ku ji bo wan biryara qedexeyê derxin jî. Em nizanin. Lê ji bo em pirtûkên xwe bi paş ve bigirin, emê hewl bidin."

Pirtûkên ku hatine desteserkirin ên gelek weşanxaneyan in, têde yên bi kurdî jî yên bi tirkî jî hene. Ji pirtûkên Siraç Bilgin bigire heta "101 soruda Demokratîk Ozerklîk", ji "Ortadoguka Kurt Devirimi" heta berhemên Qedrîcan û Feqiyê Teyran; ji "Were Dotmam", "Mewlûda Melayê Bateyê" bigire heta "Dîroka Şanoya Kurdî", "Janya", "Alfabeya Kurdî", "Kurdên Sûriyê" û gelekên din. Hema pirtûkên li wir çend jê kêfa wan lê nehatiye desteser kirine û birine.