Cemil Oguz

Ji bo Kûpaya Cîhanê ya 2018'an maçên hevtêkbirinê didomin. Îro li Îzlandayê tîma neteweyî ya Îzlanda û ya Tirkiyeyê hatin hemberî hev. Îzlandaya ku nifûsa wê bi qasî navçeyeke Stenbolê tuneye Tirkiye bi 2-0 têk bir û destvala şand mal. 

Di temamê maçê de Îzlanda serdest bû. Ligel 2 golên avêtin, gelekên nekarîn biavêjin jî hebûn. Li Tirkiyeyê lêdanek ku mirov bibêje ev çawa veneguherî golê tune bû. Îzlandayê di deqîqeya 42'yan de ji Omer Toprak (Elmar Bjarnason li gogê da, gog li Toprak ket û bû gol) û di deqîqeya 44'an de bi gola Alfred Finnbogason bi ser ket.

Maçê careke din nîşan da ku tîmên xwedî pirsgirêkan têk diçin, tîmên li hev hatî, xwedî taktîk û baweriyê bi ser dikevin.

Em niha maçê deynin aliyek û hin îstatîstîkên li ser her du tîman pêşkêş bikin.

- Tirkiye nifûsa wê 78 mîlyon e, yê Îzlandayê 323 hezar.

-Yê Tirkiyeyê 400 hezar leşkerên wê hene ku bi vê 2'yemîn artêşa mezin a li nav NATO'yê ye, lê yê Îzlandayê wê artêş nîn e.

- Buhaya tîma Tirkiyeyê 161.750.000 EURO ye, yê Îzlanda 46.400.000 EURO ye.

- Teknîk dîrektorê Tirkiyeyê Fatih Terim e ku salane  1.200.000 Euro meaşê digire, Teknîk Dîrektorê Îzlanda Heimir Hallgrimsson e, pereyeke gelek biçûk distîne, li ber Terîm jixwe ne hewceye em qal jî bikin.

- Terim pereyên digire têra wî dike ku karek din nake, lê Hallgrimsson di heman demê de diransaz e û heta çend meh berê ev karê xwe dom jî dikir.

- Tirkiye bi nîqaşên li nav tîma neteweyî rojev dagirtiye, Îzlanda bi lîstikvanên xwe yên ji jêr de hatine û li nav tîma neteweyî cih girtine xurt e.

- Tirkiye di Euro 2016'an de nekarî ji Koman derkeve, Îzlanda ji Koman derket, ji nav 16'an jî derket, ev jî ter nekir heta çarîk finalê çû û di çarîk fînalê de li hemberî Fransayê xwediyê malê têk çû.

- Li Tirkiyeyê bi ser 500 hezarî de lîstikvanên fûtbolê yên qeydkirî hene, li Îzlandayê ev hejmar 21 hezar û 500 e.

- Qeleparêzê Tirkiyeyê (Volkan Babacan) tu karek din nake hem li nav tîma neteweyî, hem li Başakşehirsporê bi têra xwe pereyan digire; qeleparêzê Îzlandayê Hannes Halldorsson (32 salî) di heman demê de derhênerê sînemayê ye.

-Li Tirkiyeyê stada ku 80 hezar kes lê temaşe dikin heye, li Îzlandayê stada herî mezin cihê 15 hezarî ye.

- Lîstikvanên Îzlandayê di tîmên mezin ên Îtalya (Juventus, Udines), tîmên Îngilistan (Fulham, Swanse City, Cardiff City, Charlton) û Almanyayê (Kaiserslautern, Agusburg, Lokeren) de dilîzin. Yên Tirkiyeyê jî li derveyî Tirkiyeyê hene mînak Arda li Barselonayê ye, Burak li Çînê û hwd. lê tîma Tirkiyeyê li nav xwe bi pirsgirêk e.

Wekî gotina dawî: Di Koma I de 6 tîm hene, hê 3 maç hatine lîstin. Di van sê maçan de Hirvanistan û Îzlanda xwedî 7 pûanan, Ukrayna bi 5 pûanan sêyemîn û Tirkiye bi 2 pûanan 4'emîn e. Finlandiya û Kosova her yek pûanek wan heye. Ji bo Kûpaya Cîhanê ya 2018'an hê gelek maye û hê gelek maç hene lê bi lîstina ku her du tîman îro lîst, ger guherîn çêneben encam ji îro de diyar e.