Cemil Oguz

Rojên fîlman a payîzê “Fîlmekîmî” ku ji aliyê ÎKSV’ê ve tê li dar xistin îsal 16’emîn car deriyên xwe vekir. Fîlmekîmî ku heta 8’ê mehê dê bidome gelek fîlmên fîlmên xelatgir ji festîvalên cur bi cur pêşkêş dike. Ji berî destpêkirina festîvalê re bilêtên hin fîlman hemû hatin firotin û seansên nû lê hatin zêdekirin. Fîlmekîmî ku her sal fîlmên xelatgir ji festîvalan berhev dike û tîne îsal jî ji van festîvalan fîlm dane hev ku bi temamî 51 fîlman pêşkêş dike.

Fîlmekîmî li Stenbolê didome û piştî Stenbolê Amed jî têde dê biçe 6 bajarên din. Di navbera 6-8’ê mehê li Edîrne (Cinemarine Sinemaları Margi Outlet), 13-15’ê mehê li Eskîşehîrê (Cinemaximum Espark), 13-17’ê mehê li Enqere (Buyulu Fener Kizilay), 20-22’yê mehê li Amedê (Cinemaximum Ceylan Karavil), 20-24’ê mehê li Îzmîrê (Cinemaximum Mavibahçe) û 27-29’ê mehê li Bodrûmê (Cinemaximum Midtown) bi fîlmên xwe dê derdikeve pêşberî sînemahezan.
Fîlmekîmî îsal bi diruşma “Fîlm Ekîmde Başlar” li ser bingeha meha kewçêrê û têkiliya sînemayê hatiye sazkirin ku têde 51 fîlm têne nîşandayîn. Seansên nava hefteyê (11.00, 13.30, 16.00) bi 8 TL, seansên 21.30 bi 20 TL û hemû seansên dawiya hefteyê 20 TL û yên bi buhaya erzan bi 14TL têne firotin. Ji bo yên endamên Vodafone Red û FreeZone dema bilêtek bikirin yê duyemîn bê pere ye.
Duh di Festîvala Edeneyê de du filmên serketî hebûn; Ji Tirkiyeyê yê Onur Unlu "Aşkin Goren Gozlere İhtiyaci Yok", ji derve jî fîlmê derhênerê rus Andrey Zvyagintsev "Loveless / Nelyubov" Xelata Fîlmê Serketî girt. Her du fîlm jî di nav bernameya festîvalê de ne. 

Ji fîlmekîmî hin fîlmên derketin pêş:
“Good Time” / Birayên Josh û Benny Safdie
Birayên Josh û Benny Safdie bi fîlmê “Good Time” li Cannesê ji bo Palmiyeya Zêrîn ketibûn pêşbaziyê û niha li Stenbolê ne.Fîlm bi navê “Soygun” (Dizî) li vir tê nîşandayîn, têkoşîna zilamekî ku dixwaze birê xwe yê girtî rizgar bike û ji bo vê yekê serî li her rêyê dide.

England Is Mine / Mark Gill
Fîlmê “England is Mine” portreya Morrissey pêşkêş dike ku di salên 1970’yî de ji ciwaniya wî heta avakirina The Smiths jiyana wî pêşkêş dike. Fîlmê vê muzîkarê hestiyar, xwediyê dengê girîng derdixe pêşberî sînemazehan.

Happy End / Michael Haneke
Michael Haneke bi fîlmê xwe yê dawî “Happy End” beşdarî pêşbaziya Cannesê bûbû niha di fîlmekîmî de tê nîşandayîn. Fîlm civakê ku her diçe bêreaksiyon dibe bi ser malbateke burjûvazî û tora civakî ve vedibêje. Fîlmê Haneke ku bi navê “Mutlu Son” tê nîşandayîn îsal li ser navê Avusturya berendamê Oscarê ye.

The Killing of A Sacred Deer / Yorgos Lanthimos
Fîlmê Yorgos Lanthimos li Cannesê Xelata Senaryoya Herî Serketî girtibû. Fîlm mijarên sûcdarî, wijdan û tolhildanê derdixe pêş û bi lîstikvanên xwe Colin Farrell û Nicole Kidman jî derdikeve pêş.

The Beguiled / Sofia Coppola
Derhêner Sofia Coppola bi vî fîlmî di Cannesê de Xelata Derhênera Herî Serketî girt. Fîlm di dema Şerê Navxweyî yê Amerîka de li şevîngeheke keçikan derbas dibe. Di sala 1971’ê de ji fîlmê derhêner Don Siegel hatiye girtin û carek din hatiye kişandin. Wê çaxê Clint Eastwood serlîstikvaniya wî kiribû. Niha Kirsten Dunst, Colin Farrell û Nicole Kidman (her duyê dawî bi fîlmê “The Killing of A Sacred Deer” jî li Fîlmekîmî ne) têde dilîzin.

Aus Dem Nichts / In the Fade / Fatih Akın
Fîlmê Fatih Akin bi navê “Paramparça” di nav festîvalê de ye ku ev fîlm li ser navê Almanyayê berendamê Oscarê ye. Serlîstikvana fîlm Diane Kruger di Cannesê de Xelata Lîstikvana Herî Serketî bû.

Tehran Taboo / Ali Soozandeh
Derhênerê îranî Alî Soozandeh bi fîlmê xwe “Tehran Taboo” li festîvalê ye. Fîlm balê dikişîne ser astengiyên pêşiya ciwanan. Fîlm yekem car li Cannesê hat nîşandayîn

Loveless / Nelyubov / Andrey Zvyagintsev
Derhênerê rus Andrey Zvyagintsev bi vî fîlmê xwe li Cannesê Xelata Taybet a Juriyê girt. Her wiha li Edeneyê jî xelat girt. Derhêner Zvyagintsev bi “Vegerê” gavek mezin avêtibû nava sînemayê, gelek bal kişandibû ser xwe, paşê bi “Sirgûn”, “Elena” û “Leviathan” ev serketina xwe dom kiribû. Ev fîlmên wî li Festîvala Stenbolê û Fîlmekîmî hatibûn nîşandayîn niha ew bi vî fîlmê xwe yê nû dîsa dibe mêvanê Stenbolê.

Aşkin Goren Gozlere İhtiyaci Yok / Blind In Love / Onur Unlu
Onur Unlu vê carê bi fîlmekî nû li pêşbezî hezkiriyên xwe ye. Ev fîlmê ku çîroka Salim ê 30 salî dedektîfê maseya cinayetê pêşkêş dike li Edeneyê Xelata Fîlmê Herî Serketî girt.

Û hin fîlmên din
- Rodin / Jacques Doillon
- A Gentle Creature / Krotkaya / Sergey Loznitsa
- Mother! / Darren Aronofsky
- Rebel In The Rye / Danny Strong
- Submergence / Wim Wenders
- Djam / Tony Gatlif
- Battle of the Sexes / Jonathan Dayton & Valerie Faris

Ji bo agahiyên zêdetir:
filmekimi.iksv.org