Diyarname

Fîlmê derhêner Serhat Karaaslan ê bi navê "Gorulmuştur" (Hatiye Qontrolkirin) li Yewnanistanê beşdarî festîvaê bû. Festîval bi navê "Panorama European Cinema (Panomaraya Sînemaya Ewropayê) îsal 32'yemîn car li dar ket. Festîval roja 21'ê sermawezê dest pê kir û 4'ê vê mehê bi dawî bû. Juriya festîvalê ji Stathis Valoukos, Antonis Boskoitis, Elisavet Chronopoulou pêk dihat. Di encaman nirxandina fîlman de juriyê "Gorulmuştur" hêjayî xelatê dît. Fîlmê Karaaslan "Gorulmuştur" xelata Fîlmê Herî Serketî yê Navneteweyî bi dest xist. Her wiha xelata Fipresci jî girt ku ev xelat ji bo bîranîna derhênerê navdar Angelopoulos tê dayîn.

Her wiha "Gorulmuştur" ji 30'emîn Festîvala Fîlman a Sîngapûrê ku serê mehê bi dawî bûbû jî Xelata Taybet a Juriyê girtibû.

Li aliyê din pêvajoya beşdariya festîvalan a Gorulmuştur didome. Fîlm niha dê beşdarî 24'emîn Festîvala Fîlman a Kerala bibe ku ev festîval di navbera 6-13'yê mehê li dar dikeve. Gorulmuştur wekî fîlmê destpêkirina festîvalê dê bê nîşandayîn.