Diyarname

Wezîrê Tenduristiyê yê Tirkiyeyê Fahrettin Koca nîvê şevê saet nêzî 1'ê şevê derket pêşberî çapemeniyê û bi awayekî fermî eşkere kir ku kesekî bi vê vîrusê ketiye.

Heta niha her çiqas îdîa hebûn ku li Tirkiyeyê hin bi vê nexweşiyê ketine jî tu daxuyanî tune bû, mesele nehatibû zelal kirin. Wezîrê Tenduristiyê yê Tirkiyeyê Koca daxuyanî da û eşkere kir ku kesekî bi vîrusê ketiye. Koca got ku ev agahiyeke xemgîn e lê ne agahiyeke mirov jê bitirse û got: "Kesekî bi tîna zêde û quxikê serî li navenda tenduristiyê daye, di encama lêkolînê de diyar bûye ku pêre vîrusa koronayê heye. Ew mêrekî ye. Em nabêjin kî ye, lê rewşa wî baş e. Em nabêjin li kîjan bajarî ye, ne hewceye em qala bajarek, nexweşxaneyek bikin."

Wezîr Koca diyar kir ku meseleya 14 rojan cidî bigirin, kesên ji derveyî Tirkiyeyê hatine divê 14 rojan di bin çavdêriyê de bin.

Ev meseleya vîruso koronayê pêşî li Çînê derket û paşê li dinyayê belav bû. Heta niha bi hezaran kes ji ber vê nexweşiyê mirine. Li Tirkiyeyê yekem car daxuyaniyeke fermî ku kesek bi vê nexweşiyê ketiye hatiye dayîn.