Diyarname

Vê sibê me "nûçeyek" bi sernavê "Barzanî: Me biryar da em derbasî alfabeya latînî dibin" weşand. Lînka nûçeyê di twitterê de di saetek de ji aliyê 10 hezar kesî ve hat dîtin. Dîsa di saetek de hezar kesî zêdetir ket malperê û ev nûçe xwend. Helbet ev "nûçe" henek bû.

Îro 1'ê Avrêlê/Nîsanê Roja Henekan a Dinyayê bû. Em wekî Diyarname her sal henekek wisa dikin. Yên ku Diyarnameyê baş dişopînin vê dizanin. Jixwe hinan gotibû "Diyarname her sal vê yekê dike" û qala henekên me yên par jî kiribûn.

Her henek di bingeha xwe de rastiyek jî dihundirî ne. Henek be jî daxwazek wisa heye ku kurd dixwazin li nav kurdan yek alfabe hebe. Hêviya me jî ew e ku rojek kurd bi yek alfabeyê hemû belgeyên xwe, pirtûkên xwe binivîsin.

Bi vê tiştek din jî derket holê ku sedî 80-90 kesên dikevin twitterê li naveroka tiştan nanêrin û RT dikin an diecibînin. Ev yek ne tiştek xweş e. Ême hêvî ew e ku mirov bikevin nava kurdî, bixwînin, hem kurdiya xwe pê bixin, hem agahiyê bi dest bixin. Em henekê jî ji bo xwendin û pêşvebirina kurdî dikin bila ev yek baş bê zanîn. Ma tiştek xirab bû di saetek de hezar kesî nûçe tikandiye û xwendiye? Ma tiştek xirab e Diyarnameyê bi tiştek wisa karî di saetek de twittek bi kurdî ji aliyê 10 hezar kesî ve bê dîtin?

Li dinyayê hin mînakên henekan

Li dinyayê piraniya çapemeniyê di vê rojê de henekan dikin. Mînak BBC di sala 2008'an de belgefîlmekî weşand; têde qala penguenên ku difirin kir. Ma Penguen dikarin bifirin?

Heman BBC di sala 1980'yan de nivîsî bû ku dê seynikên saeta Big Ben a dîrokî ya Londonê bêne rakirin û ji dêvla wê ve saetek dîjîtal bê bicihkirin. Rayedarên Londonê çawa ev nûçe xwendibûn di cih de û bi heyecan li BBC geriyabûn ku tiştek wisa nîn e. Dîsa ji Japonyayê kompaniyek li Îngilistanê geriyabû, buhayê saetên dijîtal gotibû û pêşniyar kiribûn ew dixwazin saetê saz bikin...

Kompaniya Tesla heye ku balafirên ji bo fezayê û Spae x roketan çêdike. Xwediyê wê Elon Musk di sala 2018'an de ji ser twittera xwe re pêşî agahiyek belav kir ku ew dê n^çueyek muhîm belav bike. Paşê wisa nivîs: "Tesla îflas kir."

Demek Wezareta Çandê ya Yewnanistanê ragihand ku gora Sokrates hatiye dîtin (1995). AFP'ê di cih de kir nûçe û ragihand aboneyên xwe, lê piştî çend saetan nûçe bi paş ve kişand.

Gelek mînakên wisa hene. Bi hêviya ku bêyî em dilê hev bişkînin em dê bikaribin bi hev re henekan jî bikin, xebata xwe jî bikin.