Diyarname

Em îro du pirtûkên helbestan ên nû derdixin pêş: "Li ser bircên dilê min reqsa perperokan" û "Kenbaz". Her du pirtûk jî ji aliyê du girtiyên kurd ve hatine nivîsandin û ji Weşanên Aryenê derketine.

**

KENBAZ

Kenbaz ji aliyê Musa Şanak ve hatiye nivîsandin. Şanak di sala 1964'an de li Depa Elezîzê hatiye dinê. Ji sala 1993'yan ve girtî ye. Wî berê bi navê "Nosên Tenêtiyê" (Helbest, bi kurdî) û "Mezopotamya'Da Dinlerin Doguşu ve Gelişimi" (lêkolîn, bi tirkî) nivîsandibûn. Ew niha li Girtîgeha Boluyê Tîpa F'yê de ye.

Va ye helbestek ji pirtûkê:

"Zarokno!

qurbana wî dengê we

û wan her du tiliyên we

yên serhildêr bim

ka werin, bihingivînin dilê min

ka çend gotinan bi lêv bikin

ka çend kilaman bibêjin

ka çend risteyan bixwînin

ka bifikînin...

lê bila tev ji zimanê diya min bin

da ku şad be dilê min."

**

REQSA PERPEROKAN

Ferhan Mordenîz di sala 1978'an de li Licêya Amedê hatiye dinê. Ji sala 1999'an ve girtî ye. Berî vê bi navê "Açik Yara" û "Kulde Gullenen Şarkilar" du pirtûkên helbestan bi tirkî, yek jî bi navê "Rojên Neava" bi kurdî derxistibû. Ew niha li Girtîgeha Menemena Îzmîrê ye. "Li ser bircên dilê min reqsa perperokan" duyemîn pirtûka wî ya helbestan a bi kurdî ye.

Va ye çarînek ji pirtûkê:

"reş û sar in bayên peyvên vî wext û warê xwexwarinê

bi zimanê êş û xeman dilorînim

zaroka tenêtiyê di koyê bîranînan de

û 

ji bo deyndar nemîne dil ji dildarên azadiyê re

tovê hêvî û evînên nîvco diçînim

di guldanka aramiyê de..."

**

- KENBAZ / Musa Şanak / Weşanên Aryen / 85 rûpel / Helbest / 2021

- Li ser bircên dilê min reqsa perperokan / Ferhan Mordenîz / Weşanên Aryen / 94 rûpel / Helbest / 2021