Amed
Li Amedê KCD'ê Civîna Lijneya Xwe ya Giştî li dar xist. Hevserokên KCD'ê, Hevserokên BDP'ê, Şaredarê Bajarê Mezin ê Amedê jî têde gelek kes beşdar bûn.

Hevserokê Kongreya Civaka Demokratîk (KCD) Ahmet Turk di civînê de axivî: "20 mîlyon kurd êdî bi têkiliya efendî-kole nayên bi rê ve birin. Siyaseta demokratîk neynika gelê kurd e. KCD mecbûr e rêxistinbûna xwe bigihîne her derê Kurdistanê, gel bi rêxistin bike. Bêyî berdêldayînê, bêyî keddayînê em azad nabin. Êdî 20 mîlyon kurd dixwazin bibin xwedî statuyekê. Em bi zagoneke bingehîn a demokratîk komara demokratîk ava bikin.

Hevserokê BDP'ê Selahattin Demirtaş jî axaftineke kir. Demirtaş li ser gotina Cîgerê Serokwezîr Bulent Arinç ku qala perwerdehiya bi zimanê kurdî kiribû axivî û got: "Ji kursiya meclisê mirov bibêje 'emê mafê perwerdehî, ziman, hemû mafên kurdan qebûl bikin' û mirov were bajarê ku kurd lê dijîn bibêje 'li ser zimanê zikmakî yê kurdan tu projeya me nîn e' ev yek dirûtî, rojane xapandina gel e. Ev gotina 'me perwerdehiya kurdan a bi zimanê zikmakî ji xwe wekî proje negirtiye rojeva xwe'  nîşan dide ku armanc çiqas xapandin e. Bila ew, berdevê hikumetê ka bila here li Yozgatê bibêje 'Em perwerdehiya bi zimanê zikmakî ya tirkan di cih de nabînin'. Bi li Trabzonê, li Îzmîrê ka bila vê bîne ziman. Ger li wan deran dikare bibêje bila were li vir jî bibêje 'Em perwerdehiya bi zimanê zikmakî ya bi kurdî di cih de nabînin.' Wê çaxê dê bi wate be. Li wê derê çiqas eletewş be, li vir jî ew qas eletewş e."