NAVENDA NÛÇEYAN

CPJ’ê bertek nîşanî binçavkirina rojnamegeran da û got ku divê TMK li dijî rojnamegeran wekî çek neyê bikaranîn. 

Komîteya Parastina Rojnamegeran (CPJ) têkildarî operasyona binçavkirinê ya navenda wê Amedê ku li 21 bajaran zêdetirî 126 rojnameger, hiqûqnas, hunermend, siyasetmedar û parastvanên mafên mirovan hatin binçavkirin, daxuyaniyek da. CPJ’ê bang li rayedarên Tirkiyeyê kir ku tavilê rojnamegerên ji ber xebatên xwe hatin binçavkirin berdin. Di heman demê de CPJ’e bang li dewleta tirk kir ku Qanûna Têkoşîna li Dijî Terorê (TMK) li dijî rojnamegeran wekî çek bi kar neyin. 

PARÊZERÊ AZADIYA ÇAPEMENIYÊ DI BIN ÇAVAN DE YE 

Di daxuyaniyê de hat gotin ku li gel 10 rojnamegeran, her wiha parêzer û hunermend jî hatine binçavkirin û ev tişt hatin parvekirin: “Li gorî nûçeyên têkildar; rayedarên Tirkiyeyê parêzerê azadiya çapemeniyê Resûl Temûr jî binçavkirine ku li Amedê dijî. Li gor rapora ku di 1’ê kanûna 2022’yan de hate nûkirinji 40 rojnamegerên girtî, Resûl ji nîvê wan zêdetir parêzeriya wan dike.

‘DIVÊ BÊN BERDAN’

Dîrektorê Bernameyan ê CPJ’ê Carlos Martînez de la Serna ku li New Yorkê ye jî wiha got: “Rayedarên Tirkiyeyê bi mînakeke din jî nîşan dan ku qanûnên têkoşîna li dijî terorê li dijî rojnamegeran wekî ço bi kar tîne û dê bi kar bîne. Divê rayedarên Tirkiyeyê bê şert û merc, tevahiya rojnamegerên li Amedê hatin binçavkirin û parêzer Resûl Temûrî berdin. Her wiha divê dawî li zextên xwe yên li ser çêkirina nûçeyan a derheqê pirsgirêka kurd de bînin.” 

DOSYAYÊN AMED Û ENQEREYÊ

Di daxuyaniyê de hat destnîşankirin ku rayedarên Tirkiyeyê di demên berê de jî di çarçoveya dosyayên Amed û Enqereyê de rojnamegerên kurd bi delîlên pir qels bi îdîaya “endamtiya PKK’ê” sûcdar kirine, rojnameger binçav kirine û bi mehan di girtîgehê de hiştine. 

CPJ’ê da zanîn ku ji bo şîroveyê jê bigirin ji Serdozgeriya Komarê ya Amedê re e-posta şandine lê hêj bersiv negirtine.

MA 

***

Nûçeyên Eleqedar:

- Sendîkaya Lîstikvanan û Şanogeran ji bo şanogerên kurd daxuyanî belav kirin 

- 33 baroyan daxuyanî da 

- 12 saziyên ziman û çandê li ser binçavkirinan daxuyanî dan 

- Gelek rojnameger, şanoger, muzîkar hatin binçavkirin