Diyarname

Li Tirkiyeyê dolar her ku diçe bi qîmetir dibe û pereyê tirkî ji qîmeta xwe dikeve. Û her kêliya ku hûn vê nûçeyê dixwînin asta dolar bilindtir dibe, loma jî hûn her feqîrtir dibin.

Piştî hilbijartina mebûsî û serokomariya Tirkiyeyê ku rojên 14 û 28'ê gulana 2023'yan li dar ket her diçe qîmeta dolar û euroyê bilind dibe.

Roja hilbjartinê dolar nêzî 20 TL'yî bû, piştî 28'ê gulanê bi hefteyek dolar rekor şikand derket ser 20 TL'yî. Di dîroka Tirkiyeyê de yekem car dolar duh derket 22 TL'yî îro 23 TL'yî jî derbas kir. Euro 25 TL'yî derbas kir. 

Mesele ew e ku Tirkiye nikare pêşî li vê yekê jî bigire. Piyaseya bi dolar deynan dide xwîn digire. Gelek sektor li bendê ne ka li ku dê bisekine û di dan û standinê de hatine asta rawestandinê.

Meseleya sernavê? Erê, ji bo xwendevanên me yên li Tirkiyeyê û Bakur hatiye nivîsîn. Sernav dikaribû wisa ba jî "Dema hûn vê nûçeyê dixwînin hûn feqîrtir dibin" lê bi taybetî me xwest sernav zor bê xwendin, ji ber ku mesele bi xwe meseleyeke zor û zehmet e.